لاہور۔21فروری(اے پی پی ) مستقبل میں ہونے والی سیریز اورورلڈ کپ کےلئے قومی کرکٹ ٹیم کے اسکواڈ میں نئے باصلاحیت کھلاڑی شامل کرنے کےلئے قومی سلیکشن کمیٹی پی ایس ایل میں کھلاڑیوں کی پرفارمنس کا مسلسل جائز ہ لے رہی ہے ۔قومی کرکٹ ٹیم کے چیف سلیکٹر انضمام الحق کی پی ایس ایل میں کھلاڑیوں کی پرفارمنس کاجائزہ لینے والے ٹیم مینجمنٹ کے عہدیداران سے مشاورت کےلئے کل جمعہ کے روز دوبئی روانگی متوقع ہے ۔ یو اے ای میں اپنے دورے کے دوران چیف سلیکٹر نہ صرف پی ایس ایل کے میچز میں کھلاڑیوں کی پرفارمنس کا جائزہ لیں گے بلکہ آسٹریلیا کےخلاف ایک روزہ سیریز کےلئے ہیڈ کوچ مکی آرتھر اور کپتان سرفراز احمد کے ساتھ مشاورت بھی کریں گے۔انضمام الحق نئے کھلاڑیوں کی کارکردگی کو سٹیڈیم میں بیٹھ کر دیکھیں گے اور پھر ان کو قومی ٹیم کے آئندہ دورہ میں ٹیم کا حصہ بنائیں گے ۔