دبئی۔ 22 مئی (اے پی پی) انٹرنیشنل کرکٹ کونسل (آئی سی سی) کی تازہ ترین ون ڈے پلیئرز رینکنگ میں بلے بازوں میں بابر اعظم ساتویں، فخر زمان نویں اور امام الحق 14ویں نمبر پر برقرار ہیں، شائی ہوپ لمبی چھلانگ لگا کر ٹاپ فائیو میں شامل ہو گئے، جیسن روئے اور مشفق الرحیم کی بھی ٹاپ ٹونٹی میں انٹری ہوئی ہے، پاکستان کا کوئی باﺅلرز ٹاپ ٹونٹی میں جگہ نہیں بنا سکا، شکیب الحسن دوبارہ دنیا کے نمبر ایک آل راﺅنڈر بن گئے، انہوں نے افغانستان کے راشد خان سے ٹاپ پوزیشن چھین لی۔ بدھ کو آئی سی سی کی طرف سے جاری کردہ تازہ ترین ون ڈے پلیئرز رینکنگ کے تحت بلے بازوں میں ویرات کوہلی بدستور سرفہرست ہیں، روہت شرما دوسرے نمبر پر موجود ہیں، شائی ہوپ لمبی چھلانگ لگاتے ہوئے ٹاپ فائیو میں شامل ہو گئے، انہوں نے چوتھی پوزیشن سنبھال لی، بابر اعظم کا ساتواں اور فخر زمان کا نواں نمبر برقرار ہے، امام الحق 14ویں، جونی بیئرسٹو 15ویں، جوز بٹلر 16ویں، مورگن 18ویں اور جیسن روئے 19ویں نمبر پر آ گئے ہیں، مشفق الرحیم بھی ترقی پا کر ٹاپ ٹونٹی میں شامل ہو گئے، تمیم کا 22واں نمبر ہے، سومیا سرکار بھی ترقی پا کر 28ویں نمبر پر پہنچ گئے، بین سٹوکس 30ویں، شکیب الحسن 32ویں، سرفراز احمد 47ویں نمبر پر ہیں۔ باﺅلرز میں جسپریت بمرا بدستور پہلے نمبر پر براجمان ہیں، پاکستان کا کوئی باﺅلر ٹاپ ٹونٹی میں شامل نہیں، حسن علی 26ویں، عماد وسیم 28ویں، شاداب خان 29ویں نمبر پر ہیں، آل راﺅنڈرز میں شکیب الحسن نے ایک درجہ ترقی پا کر راشد خان سے ٹاپ پوزیشن چھین لی، راشد خان تنزلی کے بعد دوسرے نمبر پر چلے گئے، عماد وسیم چوتھے اور محمد حفیظ ساتویں نمبر پر ہیں۔