کراچی۔ 24 ستمبر (اے پی پی):انیسیویں ایشین گیمز ویمنز کرکٹ ایونٹ میں سری لنکا نے پاکستان کو 6وکٹوں سے شکست دے دی،پاکستان ویمنز کو کانسی کے تمغے کیلئے کل پیر کو بنگلہ دیش کا چیلنج درپیش ہو گا جبکہ بھارت اور سری لنکا کی ٹیمیں طلائی تمغے کے حصول کیلئے قسمت آزمائی کریں گی۔
پاکستان کرکٹ بورڈ کی جانب سے یہاں جاری اعلامیہ کے مطابق اتوار کے روز کھیلے گئے سیمی فائنل میں سری لنکا ویمنز نے ٹاس جیت کر پاکستان ویمنز کو بیٹنگ کی دعوت دی توپاکستان ویمنز ٹیم نے مقررہ 20 اوورز میں 9 وکٹوں کے نقصان پر75 رنز بنائے،شوال ذوالفقار ایک چوکے کی مدد سے 16 رنز کے ساتھ ٹاپ اسکورر رہیں،منیبہ علی نے 13 اور عمائمہ سہیل نے10 رنز بنائے، کپتان ندا ڈار9 عالیہ ریاض2 اور سدرہ امین3 رنز بناپائیں،سری لنکا کی طرف سے 38 سالہ لیفٹ آرم میڈیم پیسر اودیشیکا پرابودھانی نے 21 رنز دے کر3 وکٹیں حاصل کیں، جواب میں سری لنکا ویمن ٹیم نے مطلوبہ ہدف 16.3اوورز میں چار وکٹوں کے نقصان پر حاصل کر لیا، سری لنکا کی پہلی وکٹ 17 کے مجموعی اسکور پر گری جب کپتان اتاپتو14 رنز بنا کر سعدیہ اقبال کی گیند پرڈیانا بیگ کے ہاتھوں کیچ ہوگئیں۔
انوشکا سنجیووانی کو15 رنز پر ڈیانا بیگ نے آئوٹ کیا۔ آئوٹ ہونے والی تیسری بیٹر وشمی گونارتنے تھیں جو بغیر کوئی رن بنائے ام ہانی کی گیند پر اسٹمپڈ ہوئیں۔ہارشیتھا سمارا وکرما اور نیلاکشی ڈی سلوا کی شراکت میں بننے والے 35 رنز نے سری لنکا کی جیت ممکن بنادی۔ سمارا وکرما 23 رنز بناکر رن آٹ ہوئیں ۔ ڈی سلوا ایک چھکے کی مدد سے 18 رنز بناکر ناٹ آئوٹ رہیں۔