اسلام آباد۔19ستمبر (اے پی پی):پاکستان کرکٹ ٹیم کے سابق کپتان وسیم اکرم نے کہا ہے کہ بس اب بہت ہوگیا، لوگ سوشل میڈیا پر پاکستان ٹیم کے حوالے سے گردش کرنے والی جھوٹی خبروں پر یقین نہ کریں۔
پاکستان ٹیم کے ایشیا کپ سے باہر ہونے کے بعد سوشل میڈیا پر متنازعہ کہانیوں کا سلسلہ شروع ہو گیا ہے جس پر منگل کو سوشل میڈیا پر اپنی ایک پوسٹ میں سابق کرکٹر نے کہا کہ جعلی خبریں نفرت کو جنم دیتی ہیں، لوگوں کو سوشل میڈیا پر ہر چیز کو سچ نہیں سمجھنا چاہیے، اچھائی کی نسبت برائی پر یقین کرنا ہمیشہ آسان ہوتا ہے۔
ہمارے ہاں جعلی خبریں غیر ضروری تنازعات کو جنم دیتی ہیں جس سے نفرت پیدا ہوتی ہے اور ہمارے درمیان دراڑیں مزید بڑھ جاتی ہیں، بس اب بہت ہو گیا، دونوں ممالک کو مزید ایسی چیزوں کی ضرورت نہیں ہے۔
