شاہین شاہ آفریدی ون ڈے انٹرنیشنل کرکٹ میں تیزترین 100 وکٹیں لینے والے فاسٹ بائولر بن گئے

Shaheen Afridi

کولکتہ۔31اکتوبر (اے پی پی):پاکستان کے شاہین شاہ آفریدی ون ڈے انٹرنیشنل کرکٹ میں تیزترین 100 وکٹیں لینے والے فاسٹ بائولر بن گئے، انہوں نے منگل کے روز بنگلہ دیش کے خلاف کھیلے گئے ورلڈکپ میچ میں تنزیدحسن کو آئوٹ کر کے کیریئر کی 100ویں وکٹ مکمل کر کے یہ سنگ میل عبور کیا، شاہین آفریدی نے 51 میچز میں وکٹوں کی سنچری مکمل کر کے آسٹریلوی فاسٹ بائولر مچل سٹارک کا ریکارڈ توڑ دیا جنہوں نے 52 میچز میں یہ کارنامہ سرانجام دیا تھا۔

واضح رہے کہ ون ڈے انٹرنیشنل کرکٹ کی تاریخ میں تیز ترین 100 وکٹیں لینے کا عالمی اعزاز نیپال کے سپنر سندیپ لمی چن کو حاصل ہے جنہوں نے محض 42 میچز میں یہ سنگ میل عبور کیا تھا، افغانستان کے سپنر راشد خان 44 میچز میں یہ کارنامہ سر انجام دے کر دوسرے نمبر پر موجود ہیں۔