قومی اسمبلی کے سپیکر اور ڈپٹی سپیکر کے امیدواروں نے کاغذات نامزدگی سیکرٹری اسمبلی کے پاس جمع کرا دیے،انتخاب جمعے کو ہوگا

Speaker and Deputy Speaker
Speaker and Deputy Speaker

اسلام آباد۔29فروری (اے پی پی):قومی اسمبلی کے سپیکر اور ڈپٹی سپیکر کے عہدوں کے لیے مختلف جماعتوں سے تعلق رکھنے والے امیدواروں نے اپنے کاغذات نامزدگی سیکرٹری قومی اسمبلی کے پاس جمع کرا دیے۔ جمعرات کو قومی اسمبلی کے اجلاس کے آغاز پر سپیکر قومی اسمبلی راجہ پرویز اشرف نے ارکان سے حلف لینے کے بعد اعلان کیا کہ سب سے پہلے قومی اسمبلی کے رول آف ممبرز پر وہ امیدوار دستخط کریں گے جنہوں نے سپیکر اور ڈپٹی سپیکر کے لیے کاغذات نامزدگی جمع کرانے ہیں ،

مسلم لیگ ن کے سردار ایاز صادق نے سپیکر، پاکستان پیپلز پارٹی کے سید غلام مصطفی شاہ نے ڈپٹی سپیکر ،سنی اتحاد کونسل کے ملک عامر ڈوگر نے سپیکر اور جنید اکبر نے ڈپٹی سپیکر کے عہدے کے لیے اپنے کاغذات نامزدگی سیکرٹری قومی اسمبلی کے پاس ایوان میں ہی جمع کرائے ۔ کاغذات نامزدگی جمع کرانے کا وقت ختم ہونے اور جانچ پڑتال کے بعد اسمبلی سیکرٹریٹ امیدواروں کی حتمی فہرست جاری کرے گا ۔ نئے سپیکر اور ڈپٹی سپیکر کا الیکشن کل( جمعے کو )ہوگا۔