اسلام آباد۔8جولائی (اے پی پی):مشیر امور کشمیر و گلگت بلتستان قمر زمان کائرہ نے شہید کشمیری نوجوان برہان مظفر وانی کی چھٹی برسی کے موقع پر شہید کو زبردست خراج عقیدت پیش کیا ہے ۔
مشیر امور کشمیر و گلگت بلتستان قمر زمان کائرہ نے کہاکہ برہان مظفر وانی شہید مقبوضہ کشمیر میں بھارتی بربریت کے خلاف مزاحمت کی ایک بے مثال علامت ہیں، برہان وانی نے مقبوضہ کشمیرکی پڑھی لکھی نوجوان نسل میں جدوجہد کی ایک نئی روح پھونکی، ان جیسے لاکھوں نوجوان اپناحق خودارادیت حاصل کرنے کے لیے پر عزم ہیں۔
قمر زمان کائرہ نے کہاکہ قابض بھارتی افواج کشمیریوں بلخصوص نوجوانوں کا بے دریغ قتل عام کررہی ہیں، مقبوضہ وادی میں روزانہ نہتے کشمیری نوجوانوں کو نام نہاد سرچ آپریشنز میں شہید کردیا جاتا ہے،بھارت نے 40 لاکھ غیر ریاستی افراد کو مقبوضہ کشمیر کی شہریت دید ی ہے، بھارت مقبوضہ کشمیر کی ڈیمو گرافی تبدیل کرکے مسلمان اکثریت کو اقلیت میں تبدیل کرنا چاہتا ہے، غیور اور بہادر کشمیری بھارت کے اوچھے ہتھکنڈوں کو کسی صورت میں کامیاب نہ ہونے دیں گے،
پاکستان دنیا کے تمام فورمز پر اپنے کشمیری بہنوں اور بھائیوں کی بھرپور حمایت جاری رکھے ہوئے ہے۔ قمر زمان کائرہ نے کہاکہ بلاول بھٹو زرداری مسئلہ کشمیر کو دنیا کے تمام فورمز پر بھرپور انداز میں اجاگر کر رہے ہیں۔
