اسلام آباد۔19مارچ (اے پی پی):ملک بھر میں 24 گھنٹوں کے دوران کورونا وائرس کے103 نئے کیس رپورٹ ہوئے ہیں جن میں سے 16 مریضوں کی حالت تشویش ناک ہے۔ہفتہ کوقومی ادارہ صحت(این آئی ایچ)کی جانب سے جاری اعدادوشمار کے مطابق ملک بھر میں 24 گھنٹوں کے دوران 4 ہزار685 کورونا ٹیسٹ کیے گئے جن میں سے 103 افراد کے ٹیسٹ مثبت آئے جس کے باعث کورونا ٹیسٹ کی مثبت شرح2.20فیصد رہی اور اس دوران کورونا وائرس سے کوئی مریض جاں بحق نہیں ہوا جب16 کی حالت تشویشناک ہے۔
گزشتہ 24 گھنٹوں کے دوران ملک کے مختلف شہروں میں کئے گئے کورونا ٹیسٹ اور مثبت کیسز کے حوالے سے لاہور میں550 ٹیسٹوں میں 20 افراد کے ٹیسٹ مثبت آئے اور وہاں پر شرح 3.64 فیصد رہی۔ اسی طرح اسلام آباد میں 356 ٹیسٹوں میں 20 افراد کے ٹیسٹ مثبت آئے اور شرح 5.62 فیصد رہی اور گجرات میں 160 ٹیسٹوں میں سے3 افرادکے ٹیسٹ مثبت آئے اور شرح 1.88 فیصد رہی ۔
