اسلام آباد۔20نومبر (اے پی پی):ملک میں براہ راست غیرملکی سرمایہ کاری میں جاری مالی سال کے پہلے چارماہ میں سالانہ بنیادوں پر7 فیصدکی نموریکارڈکی گئی ہے۔
سٹیٹ بینک کی جانب سے جاری کردہ اعدادوشمارکے مطابق جاری مالی سال کے پہلے 4 ماہ میں پاکستان میں براہ راست غیرملکی سرمایہ کاری کاحجم 525 ملین ڈالرریکارڈکیاگیا جوگزشتہ مالی سال کی اسی مدت کے مقابلہ میں 7 فیصدزیادہ ہے، گزشتہ مالی سال کی اسی مدت میں ملک میں براہ راست غیرملکی سرمایہ کاری کاحجم 490 ملین ڈالرریکارڈکیاگیاتھا۔
جاری مالی سال کے پہلے چارماہ میں چین، برطانیہ، نیدرلینڈ اورامریکا پاکستان میں غیرملکی سرمایہ کاری کے حوالہ سے سرفہرست ہیں، چین نے جاری مالی سال کے پہلے چارماہ میں ملک میں 158 ملین ڈالر، برطانیہ نے 64 ملین ڈالر، نیدرلینڈ نے 56 ملین ڈالر اوامریکا نے 35 ملین ڈالرکی براہ راست غیرملکی سرمایہ کاری کی ہے۔
سوئٹزرلینڈ، سنگاپوراوریواے ای نے بالترتیب 33 ملین ڈالر، 29 ملین ڈالر اور18 ملین ڈالرکی سرمایہ کاری کی۔
