میٹا اے آئی کی رسائی اور صلاحیتوں میں نمایاں اضافہ

میٹا اے آئی کی رسائی اور صلاحیتوں میں نمایاں اضافہ

اسلام آباد۔20اپریل (اے پی پی):مارک زکر برگ نے تمام پلیٹ فارمز پر ورچوئل معاونت کے تجربے میں انقلاب برپا کرتے ہوئے میٹا اے آئی (مصنوعی ذہانت)کی خصوصیات میں نمایاں اضافہ کیا ہے۔

میٹا اے آئی اب ان تازہ ترین اپ ڈیٹس کے ساتھ پاکستان سمیت ایک درجن سے زائد نئے ممالک کے صارفین کیلئے زیادہ اسمارٹ،تیز اور قابل رسائی بن جائیگا۔ میٹا اے آئی اب بناء کسی رکاوٹ کے واٹس ایپ،انسٹا گرام،میسنجر،فیس بک،رے بین،میٹا اسمارٹ گلاسز اور کوئسٹ3جیسی مشہور ایپس میں ضم ہوجائیگا۔

اس اقدام کے ذریعے صارفین اب تحقیقی معاونت سے لے کر گروپ ٹرپس کی منصوبہ بندی،تصویری کیپشن کی تیاری اور دیگر بہت سے فنکشنز سے لطف اندوز ہوسکیں گے۔ میٹا نے کہا ہے کہ مختلف پلیٹ فامرز پر دستیاب میٹا اے آئی آپ کے ذاتی معاون کے طور پر کام کرے گا۔صارفین ایپس میں نیلے دائرے کے آئیکون کو تلاش کرکے یا چیٹس میں @meta ai’ ٹائپ کرکے میٹا اے آئی تک رسائی حاصل کرسکیں گے۔میٹا اے آئی،تخلیقی و پیداواری صلاحیتوں،سوالات میں معاونت،گروپ چیٹس میں مباحثے،تصویر کی تخلیق،ٹرپ کی تیاری اور دیگر تجربات کو بڑھاتا ہے۔

صارفین اب فیس بک،انسٹا گرام،واٹس ایپ اور میسنجر پر سرچ فیچرز کی مدد سے براہ راست میٹا اے آئی سے سوالات پوچھ سکتے ہیں۔میٹا اے آئی کھیل،تفریح اورموجودہ واقعات سے متعلق تجاویز یا سوالات کے جوابات دیتا ہے۔میٹا اے آئی اب meta.ai کے ذریعے ویب پر قابل رسائی ہے،جو ای میل معاونت،تحقیق اورکمپیوٹر کے عمومی کاموں کیلئے موزوں ہے۔

میٹا اے آئی،آسٹریلیا،کینیڈا،گھانا،جمیکا،ملاوی،نیوزی لینڈ،سنگاپور،جنوبی افریقہ،یوگنڈا،زیمبیا اور زمبابوے جیسے مزید ممالک میں انگریزی بولنے والے صارفین کیلئے اپنی دستیابی بڑھا رہا ہے۔یہ اضافہ جدید ترین انجن پر مبنی میٹا اے آئی کے Meta Llama 3 کے باعث ممکن ہوا۔میٹا اے آئی مسلسل ترقی کی جانب گامزن ہے اوردنیا بھر کے صارفین کو ان کے ڈیجیٹل تجربات اورپیداواری صلاحیت میں اضافے کے لئے معاونت فراہم کرتا ہے۔