نیویارک ۔23ستمبر (اے پی پی):نگران وزیر خارجہ جلیل عباس جیلانی نے موسمیاتی تبدیلی سے پیدا ہونے والی قدرتی آفات، بڑھتے ہوئے تنازعات کے تناظر میں ترقی پذیر ممالک کی مدد کیلئے بین الاقوامی مالیاتی ڈھانچے میں اصلاحات کے لیے گروپ 77 اور چین کے ذریعے ایکشن پلان کو اپنانے کی تجویز پیش کی ہے۔ جمعہ کو ترجمان وزارت خارجہ کی طرف سے جاری بیان کے مطابق نگران وزیر خارجہ جلیل عباس جیلانی نے گروپ۔ 77 اور چین کے وزرائے خارجہ کے 47 ویں سالانہ اجلاس میں ”بین الاقوامی مالیاتی ڈھانچے کی اصلاح کا ایک راستہ” پر ایک انٹرایکٹو ڈائیلاگ میں پاکستان کا نکتہ نظر پیش کیا۔
وزیر خارجہ نے کہا کہ گزشتہ تین سالوں میں ترقی پذیر ممالک کی معیشتیں کوویڈ 19 وبائی امراض کے اثرات سے تباہ ہو چکی ہیں۔ انہوں نے کہا کہ موسمیاتی تبدیلی سے پیدا ہونے والی قدرتی آفات اور بڑھتے ہوئے تنازعات کے تناظر میں ترقی پذیر ممالک کی مدد کیلئے بین الاقوامی مالیاتی ڈھانچے میں اصلاحات کیلئے گروپ ۔ 77 اور چین کے ذریعے ایکشن پلان کو اپنانے کی تجویز پیش کی۔ انہوں نے ان اصلاحات کی نگرانی اور ان پر عمل درآمد کے لیے اقوام متحدہ کے اندر میکانزم بنانے کی تجویز بھی دی۔
