پوچیفسٹروم۔21جنوری (اے پی پی):ویمنز انڈر 19 ورلڈ کپ کے سپر سکس مرحلے میں ( کل ) اتوار کو مزید دو میچ کھیلے جائیں گے ، پہلے میچ میں بھارت اور سری لنکا جبکہ دوسرے میچ میں ویسٹ انڈیز اور روانڈا کی ٹیمیں مدمقابل ہوں گی ، انٹرنیشنل کرکٹ کونسل (آئی سی سی) کے زیر اہتمام پہلے خواتین انڈر 19 ورلڈ کپ کے دلچسپ مقابلے جنوبی افریقہ میں جاری ہیں، سپر سکس مرحلے میں اتوار کے روز پہلا میچ بھارت اور سری لنکا کے درمیان کھیلا جائے گا
جبکہ اسی روز دوسرے میچ میں ویسٹ انڈیز اور روانڈا کی انڈر 19 ٹیمیں آمنے سامنے ہوں گی ، دونوں میچز پوچیفسٹروم کے مقام پر کھیلے جائیں گے، واضح رہے کہ پاکستانی ٹیم سپر سکس مرحلے میں اپنا پہلا میچ 23 جنوری کو آئرلینڈ جبکہ دوسرا میچ 24 جنوری کو نیوزی لینڈ کے خلاف کھیلے گی۔