کراچی۔ 20 ستمبر (اے پی پی):پاکستان کرکٹ ٹیم کےفاسٹ بولرشاہین شاہ آفریدی رشتہ ازدواج سے منسلک ہو گئے، ان کا نکاح قومی کرکٹ ٹیم کے سابق کپتان شاہد خان آفریدی کی صاحبزادی انشا آفریدی سے ہوا ہے۔ منگل کی شب منعقدہ رخصتی کی تقریب ڈیفنس ہائوسنگ اتھارٹی میں واقع نجی بینکوئٹ ہال میں ہوئی۔
سفید کپڑوں کے ساتھ کریم رنگ کی شیروانی میں ملبوس دلہا شاہین آفریدی اپنے قریبی عزیز واقارب اور رشتے داروں کے ہمراہ بارات لے کر پہنچے تو شاہدخان آفریدی نے ان کا پرتپاک استقبال کیا۔تقریب میں پاکستان کرکٹ ٹیم کے کپتان بابر اعظم، سابق ٹیسٹ کپتان مصباح الحق، سعید انور سمیت دیگر کرکٹرز، شوبز کی معروف شخصیات، سیاست داں اور مختلف شعبہ ہائے زندگی سے تعلق رکھنے والی اہم شخصیات بھی شریک تھیں۔
ٹیسٹ کپتان بابر اعظم نے شاہین شاہ افریدی اور شاہد خان آفریدی کو گرم جوشی کے ساتھ گلے لگا کر شادی کی مبارک باد پیش کی۔تقریب کے شرکاء کی تواضع مشروبات کے بعد مختلف اقسام کے کھانوں سے کی گئی۔ ولیمہ کی تقریب جمعرات کو اسلام آباد میں ہوگی۔ قبل ازیں پیر کی شب رسم حنا میں قریبی عزیزو اقارب نے شرکت کی تھی۔ یاد رہے کہ شاہین آفریدی اور انشاء افریدی کا نکاح 23 فروری کوہواتھا۔