اسلام آباد۔27فروری (اے پی پی):وزارت خزانہ نے کہاہے کہ کلیدی معاشی اشاریوں میں نمایاں بہتری آرہی ہے، ترسیلات زر اور برآمدات میں اضافہ جبکہ افراط زر اور پالیسی ریٹ میں کمی سے معاشی بہتری کی عکاسی ہورہی ہے،فروری میں افراط زر کی شرح دو سے تین فیصد تک جبکہ مارچ میں تین سے چار فیصد کے درمیان رہنے کا امکان ہے۔یہ بات وزارت خزانہ کی جانب سے جاری کردہ ماہانہ اقتصادی اپ ڈیٹ میں کہی گئی ہے جس کے مطابق جنوری میں ترسیلات زر کا حجم 3.002ارب ڈالر ریکارڈ کیا گیا جو گزشتہ سال جنوری کے2.398ارب ڈالرکے مقابلے میں 25.2فیصدزیادہ ہے۔ جنوری میں برآمدات کا حجم 2.940ارب ڈالر ریکارڈ کیا گیا جو گزشتہ سال جنوری کے 2.680ارب ڈالرکے مقابلے میں 9.7فیصد زیادہ ہے۔
درآمدات کا حجم 5.455ارب ڈالر ریکارڈ کیا گیا جو گزشتہ سال جنوری کے 4.669ارب ڈالرکے مقابلے میں 16.8فیصد زیاد ہ ہے۔ حسابات جاریہ کے کھاتو ں کا خسارہ 420ملین ڈالر ریکارڈ کیا گیا۔ جنوری میں براہ راست غیرملکی سرمایہ کاری کا حجم 194 ملین ڈالر جبکہ مجموعی غیرملکی سرمایہ کاری کا حجم 99.2ملین ڈالر رہا۔جولائی سے جنوری تک کی مدت میں زرمبادلہ کے ذخائرکا حجم 15.948ارب ڈالر ریکارڈ کیا گیا۔14 فروری کو ایکسچینج ریٹ279.21 روپے ریکارڈ کیا گیا جو گزشتہ سال 14 فروری کو 279.32روپے تھا۔ جولائی سے دسمبرتک کی مدت میں ایف بی آر کی مجموعی محصولات کا حجم 6497.4ارب روپے ریکارڈ کیا گیا جو گزشتہ مالی سال کی اسی مدت 5149.6ارب روپے کے مقابلے میں 26.2فیصد زیادہ ہے۔
جنوری میں ایف بی آرکے محصولات کا حجم 872.6ارب روپے ریکارڈ کیا گیا جو گزشتہ سال جنوری کے 680.3ارب روپے کے مقابلے میں 23.8فیصد زیادہ ہے۔ جولائی سے دسمبر تک نان ٹیکس ریونیو کا حجم 3602 ارب روپے ریکارڈ کیا گیا جو گزشتہ مالی سال کی اسی مدت کے 1979.1ارب روپے کے مقابلے میں 82فیصد زیادہ ہے۔ جولائی سے دسمبرکے دوران مالی خسارے کا حجم 1537.9ارب روپے ریکارڈ کیا گیا جو گزشتہ مالی سال کی اسی مدت کے 2407.8ارب روپے کے مقابلے میں 36.1فیصد کم ہے۔ پرائمری بیلنس کا حجم 3603.7ارب روپے ریکارڈ کیا گیا جو گزشتہ سال کی اسی مدت کے 1812.2ارب روپے کے مقابلے میں 98.9فیصد زیادہ ہے۔
یکم جولائی سے 14 فروری تک کی مدت میں نجی شعبے کو 742.1ارب روپے کے قرضہ جات فراہم کئے گئے جو گزشتہ سال کی اسی مدت میں 246.8ارب روپے تھے۔ گزشتہ سال جون کے اختتام پر پالیسی ریٹ 22فیصد تھا جو 7 جنوری 2025کو کم ہوکر12فیصد ہوگیا ہے۔وزارت خزانہ کے مطابق جنوری میں صارفین کے لئے قیمتوں کا عمومی اشاریہ 2.4فیصد ریکارڈ کیا گیا جو گزشتہ سال جنوری میں 28.3فیصد تھا۔جولائی سے جنوری تک کی مدت میں صارفین کےلئے قیمتوں کا اوسط ماہانہ اشاریہ6.5فیصد ریکارڈ کیا گیا جو گزشتہ سال کی اسی مدت میں 28.7فیصد تھا۔
وزارت خزانہ کے مطابق 25 فروری کوپاکستان سٹاک ایکسچینج کا 100 انڈیکس ایک لاکھ14 ہزار528پوائنٹس ریکارڈ کیا گیا جو24 فروری 2024کو63 ہزار306پوائنٹس تھا ۔ ایک سال کی مدت میں 100 انڈیکس میں 80.9فیصد کا اضافہ ہوا ہے۔ 25 فروری کومارکیٹ کیپیٹلائزیشن کا حجم 50.5ارب ڈالر ریکارڈ کیا گیا جو گزشتہ سال 24 فروری کو 32.7فیصد تھا۔ ایک سال کی مدت میں سٹاک ایکسچینج کی مارکیٹ کیپیٹلائزیشن میں 54.4 فیصد کا اضافہ ہوا ہے۔ نئی کمپنیوں کی رجسٹریشن میں 16.5 فیصد کی نمو ریکارڈ کی گئی ہے۔
وزارت خزانہ کے مطابق زرعی پیداوارمیں اضافہ کےلئے حکومت مختلف اقدامات کررہی ہے، حکومت کسانوں کو تمام ممکنہ سہولیات کی فراہمی کےلئے پرعزم ہےتاہم ساز گار موسمیاتی عوامل پیداوار ی ہدف کے لحاظ سے کلیدی حیثیت رکھتے ہیں۔بارانی علاقوں میں خشک سالی کی وجہ سے ربیع کی فصلوں کےلئے دبائوکی صورتحال پیدا ہوسکتی ہے۔
بڑی صنعتوں کی پیداوار میں ماہانہ بنیادوں پر آئندہ چند ماہ کے دوران بحالی متوقع ہے، مشینری اور خام مال کی درآمدات میں اضافے سے صنعتی سرگرمیاں تیز ہوں گی اسی طرح سیمنٹ کی کھپت میں بھی تیزی آرہی ہے، مہنگائی کے دبائو میں کمی کے نتیجہ میں پالیسی ریٹ میں بھی بتدریج کمی آرہی ہے جس سے کاروباری اعتماد میں اضافہ ہوگا۔ فروری میں افراط زر کی شرح دو سے تین فیصد تک جبکہ مارچ میں تین سے چار فیصد کے درمیان رہنے کا امکان ہے۔
Short Link: https://urdu.app.com.pk/urdu/?p=567023
