۔11ویں سلطان جوہر ہاکی کپ،پاکستان نے نیوزی لینڈ کو 2-3گولز سے شکست دے دی

۔11ویں سلطان جوہر ہاکی کپ،پاکستان نے نیوزی لینڈ کو 2-3گولز سے شکست دے دی

جوہرباڑو۔28اکتوبر (اے پی پی):گیارہویں سلطان جوہر ہاکی کپ میں پاکستان نے اپنے دوسرے میچ میں نیوزی لینڈ کو3-2گولز سے شکست دے کر پہلی کامیابی حاصل کر لی۔ملائشیا کے شہر جوہر باڑو میں جاری ایونٹ میں ہفتہ کو کھیلے گئے میچ میں پاکستان اور نیوزی لینڈ کے درمیان زبردست مقابلہ دیکھنے کو آیا تاہم پاکستانی ٹیم نے شاندار کھیل کی بدولت 2کے مقابلے میں 3گول سے کامیابی حاصل کی، 7ویں منٹ میں ارباز علی نے پینلٹی کارنرپرگول کر کے پاکستان کو برتری دلائی، پاکستان کے بشارت علی نے 30ویں منٹ میں پنالٹی کارنر پر گول کر کے ٹیم کی برتری دوگنی کر دی، 48ویں منٹ میں پاکستان کے محمد سفیان نے پنالٹی کارنر پر گول کر کے ٹیم کی برتری 3-0گولز کر دی اور نیوزی لینڈ پر دبائو بڑھا دیا تاہم اس کے بعد نیوزی لینڈ کی ٹیم نے شاندار کھیل پیش کیا اور 58ویں منٹ میں نیلسن نے ٹیم کی طرف سے پہلا گول کیا،

اس کے بعد نیوزی لینڈ کی ٹیم نے پاکستان کی برتری ختم کرنے کیلئے سرتوڑ کوشش کی تاہم پاکستان کے مضبوط دفاع نے اسے کامیاب نہ ہونے دیا، کھیل کے آخری منٹ میں نیوزی لینڈ کے پیٹرک نے گول کیا تاہم حریف ٹیم پاکستان کی برتری برابر کرنے میں ناکام رہی، اسطرح پاکستان نے نیوزی لینڈ کو 3-2گولز سے ہرا کر کامیابی سمیٹی۔ قومی ٹیم کے ہمراہ آفیشلز میں ٹیم منیجر لفٹیننٹ کرنل (ر)آصف ناز کھوکھر،کنسلٹنٹ رویلمنٹ آلٹمنس،کوچ اولمپیئن شکیل عباسی،آصف احمد خان انٹرنیشنل ، محمد علی انٹرنیشنل، ویڈیو انالسٹ ندیم خان لودہی موجود ہیں۔پاکستان جونیئر ہاکی ٹیم تیسرا اور پول کا آخری میچ 31 اکتوبر کو میزبان ملائشیاء کے ساتھ 5:34 بجے کھیلے گی،ایونٹ میں شامل ٹیموں کو دو پول میں تقسیم کیا گیا ہے ،پول اے میں آسٹریلیا، جرمنی، برطانیہ اور ساؤتھ افریقہ شامل ہیں جبکہ پول بی میں بھارت،ملائشیا، نیوزی لینڈ اور پاکستان شامل ہیں۔