پاکستان کا بحیرہ روم میں کشتیوں کے سمندر برد ہونے اور اس کے نتیجے میںپناہ گزینوں کی اموات پر تشویش کا اظہار
عالمی برادری پناہ گزینوں اور نقل مکانی کرنے والے افراد کو نظر اندازنہ کرے‘ پاکستان چارعشروں سے 30 لاکھ سے زائد پناہ گزینوں کی میزبانی کررہا ہے
اقوام متحدہ میں پاکستان کی مستقل مندوب ڈاکٹر ملیحہ لودھی کا نیو یارک میں خطاب
اقوام متحدہ ۔ 10 جون(اے پی پی) پاکستان نے بحیرہ روم میں پناہ گزینوں کو لے جانے والی کشتیوں کے سمندر برد ہونے اور اس کے نتیجے میں قیمتی انسانی جانوں کے نقصان پر تشویش کا اظہار کرتے ہوئے اس ضمن میں جامع اقدامات کی ضرورت پر زور دیا ہے۔یہ بات اقوام متحدہ میں پاکستان کی مستقل مندوب ڈاکٹر ملیحہ لودھی نے پناہ گزینوں اور تارکین وطن کے نقل مکانی کے بارے میں ایک دستاویز کی تیاری کے لئے ہونے والے مذاکرات میں کہی۔ڈاکٹر ملیحہ لودھی نے کہا کہ پناہ گزینوں کے موجودہ بحران میں نقل مکانی کے دوران انسانی ہلاکتوں کے بڑھتے ہوئے واقعات باعث تشویش ہے۔ ہر سال یورپ جانے کی کوشش کے دوران سینکڑوں پناہ گزین بحیرہ روم میں کشتیوں کے حادثات میں اپنی جانوں سے ہاتھ دھو بیٹھتے ہیں۔اس مسئلہ سے نمٹنے کے ضمن میں اقوام متحدہ کے ہیڈ کوارٹر میں رواں سال 19 ستمبر کو ایک اعلیٰ سطح کا اجلاس منعقد ہو رہا ہے جس میں اس مسئلے کے مختلف پہلوﺅں کا جائزہ لیا جائے گا اور مختلف تجاویز پر غور کیا جائے گا۔ ڈاکٹر ملیحہ لودھی نے کہا کہ عالمی برادری کو پناہ گزینوں اور نقل مکانی کرنے والے افراد کو نظر انداز نہیں کرنا چاہئے‘ اس مسئلہ کے مستقل اور دیرپا حل ضروری ہے انہوں نے کہا کہ پاکستان پناہ گزینوں کے مسائل سے بخوبی آگاہ ہے کیونکہ گزشتہ چار عشروں سے پاکستان 30 لاکھ سے زائد پناہ گزینوں کی میزبانی کررہا ہے۔
Short Link: https://urdu.app.com.pk/urdu/?p=8287
