احمد آباد۔30مارچ (اے پی پی):بورڈ آف کنٹرول برائے کرکٹ ان انڈیا (بی سی سی آئی ) کے زیراہتمام انڈین پریمیئر لیگ (آئی پی ایل)2023 کا 16واں ایڈیشن کل (جمعہ سے) بھارت کے شہر احمد آباد میں شروع ہوگا، جس کے کامیاب انعقاد کے لئے تیاریاں مکمل کر لی گئیں ہیں۔ ٹورنامنٹ کا افتتاحی میچ کل جمعہ کو دفاعی چیمپئن گجرات ٹائٹنز اور چنائی سپر کنگز کے درمیان نریندر مودی سٹیڈیم، احمد آباد میں کھیلا جائے گا۔
غیر ملکی کھلاڑیوں کا بھارت آمد کا سلسلہ جاری ہے ۔ لیگ کے 16ویں ایڈیشن میں شامل 10 ٹیموں کےدرمیان مجموعی طور پر74میچ کھیلے جائیں گے ، جو بھارت کے 12 مقامات پر کھیلے جائیں گے جن میں احمد آباد،بنگلور ،چنائی ،نئی دہلی،دھرم شالہ،گوہاٹی،حیدرآباد،جے پور،کولکتہ،لکھنئو،موہالی اور ممبئی شامل ہیں۔آئی پی ایل کے 16 ایڈیشن میں گوہاٹی سٹیڈیم اپنا آئی پی ایل ڈیبیو کرے گا ۔
لیگ میں گجرات ٹائٹنز کی ٹیم ٹائٹل کا دفاع کے لئے ایکشن میں ہوگی ۔ لیگ میں شامل 10 ٹیموں میں دفاعی چیمپئن گجرات ٹائٹنز کے علاوہ دیگر ٹیموں میں چنائی سپر کنگز ،ممبئی انڈینز، دہلی کیپٹلز، کولکتہ نائٹ رائیڈرز، پنجاب کنگز، راجستھان رائلز، رائل چیلنجرز بنگلور ، سن رائزرز حیدر آباد ،اور لکھنؤ سپر جائنٹس شامل ہیں۔
ٹورنامنٹ کا فیصلہ کن معرکہ 28 مئی کو ہو گا۔ واضح رہے کہ ممبئی انڈینز کو سب سے زیادہ پانچ بار آئی پی ایل کا ٹائٹل جیتنے کا اعزاز حاصل ہے۔ چنائی سپر کنگز نے چار، کولکتہ نائٹ رائیڈرز نے دو جبکہ راجستھان رائلز، سن رائزرز حیدر آباد ، دکن چارجرز اور گجرات ٹائٹنز نے ایک، ایک بار چیمپئن ہونے کا اعزاز حاصل کیا ہے۔آئی پی ایل کا لیگ مرحلہ بھارت کے 12 مقامات پر کھیلا جائے گا جبکہ شیڈول کے پلے آف مرحلے کا اعلان ہونا ابھی باقی ہے۔