برازیلین شوگر کین ریسرچ انسٹی ٹیوٹ کے سابق ڈائریکٹر کا پاکستان شوگر ملز ایسوسی ایشن لاہور کا دورہ، پاکستان کے گنے کے تحقیقی اداروں کو مکمل تکنیکی مدد کی یقین دہانی کرائی

لاہور۔9دسمبر (اے پی پی):برازیلین شوگر کین ریسرچ انسٹی ٹیوٹ کے سابق ڈائریکٹر ڈاکٹر ولیم لی برنکوئسٹ نے پاکستان شوگر ملز ایسوسی ایشن نارتھ زون آفس لاہور کا دورہ کیا اور پاکستان کے گنے کے تحقیقی اداروں کو مکمل تکنیکی مدد کی یقین دہانی کرائی، جدید افزائش کی تکنیکوں، فصلوں کے انتظام کے جدید طریقوں اور گنے کے فضلے کو ویلیو ایڈڈ کمرشل مصنوعات میں تبدیل کرنے کے لیے ٹیکنالوجیز میں تعاون کی پیشکش کی۔

ڈاکٹر لی نے اپنے دورے کے دوران شوگر کین ریسرچ اینڈ ڈویلپمنٹ بورڈ کے چیئرمین چوہدری محمد ذکا اشرف سے ایک اہم ملاقات کی۔اس موقع پر بورڈ ممبران، پروفیسرز، شوگر ملز ایسوسی ایشن کے عہدیداران، اور صوبہ بھر سے شوگر ملز مالکان نے بھی شرکت کی۔ڈاکٹر لی نے سامعین کو برازیل میں گنے کی موجودہ صورت حال سے آگاہ کیا جو کہ دنیا کے سب سے بڑے گنے پیدا کرنے والے ممالک میں سے ایک ہے اور عالمی بہترین طریقوں پر مبنی اپنے قیمتی تجربات اور مشاہدات کے بارے مفید معلومات فراہم کیں۔

انہوں نے پنجاب میں کاشتکار برادری کو درپیش کلیدی چیلنجوں کے ممکنہ حل پر روشنی ڈالی، خاص طور پر فصلوں کی پیداواری صلاحیت، موسمیاتی تنا اور پائیداری سے متعلق مسائل پر گفتگو کی۔ انہوں نے گنے کی فصل کی قدر میں اضافے کی اہمیت پر زور دیا خاص طور پر اس کی ضمنی مصنوعات کے موثر استعمال کے ذریعے اور گنے میں حقیقی افزائش کے پروگراموں کو مضبوط بنانے کے لیے عملی سفارشات پیش کیں۔

انہوں نے پاکستان کے گنے کے تحقیقی اداروں کو مکمل تکنیکی مدد کی یقین دہانی کرائی، جدید افزائش کی تکنیکوں، فصلوں کے انتظام کے جدید طریقوں اور گنے کے فضلے کو ویلیو ایڈڈ کمرشل مصنوعات میں تبدیل کرنے کے لیے ٹیکنالوجیز میں تعاون کی پیشکش کی۔چوہدری محمد ذکا اشرف، چیئرمین، ایس آر ڈی بی نے ڈاکٹر برن کیوسٹ کی قیمتی تجاویز کیلئے ان کا شکریہ ادا کیا اور کہا کہ وہ ان تجاویز کو قدر کی نگاہ سے دیکھتے ہیں ۔

انہوں نے کہا کہ ڈاکٹر لی کی رہنمائی پائیدار بنیادوں پر گنے کی پیداوار کو بڑھانے اور مستقبل کے چیلنجوں کا مقابلہ کرنے والی آب و ہوا کیلئے لچکدار گنے کی اقسام تیار کرنے میں اہم کردار ادا کرے گی۔