دبئی۔27فروری (اے پی پی):بھارت کی مردوں کی کرکٹ ٹیم کے کپتان اور مایہ ناز اوپننگ بلے باز روہت شرما نے آئی سی سی چیمپئنز ٹرافی میں نیوزی لینڈ کے خلاف اپنے آخری گروپ اے کے میچ سے قبل نیٹ پریکٹس میں حصہ نہیں لیا، جس سے ان کی فٹنس بارے تشویش پیدا ہو گئی ہے۔پاکستان کے خلاف میچ میں روہت شرما کو ہیمسٹرنگ تکلیف محسوس ہوئی تھی لیکن میچ کے بعد انہوں نے کہا تھا کہ وہ ٹھیک ہیں اور فکر کی کوئی بات نہیں۔
روہت شرما کی انجری کے حوالے سے بی سی سی آئی کا کوئی بیان سامنے نہیں آیا تاہم کپتان روہت شرما نے پریکٹس سیشن کے دوران سخت جسمانی سرگرمیوں سے گریز کیا اور صرف ہلکی دوڑ اور شیڈو بیٹنگ کی۔یہ احتیاطی تدابیر اس لئےاختیار کی گئیں تاکہ ان کی چوٹ مزید نہ بڑھے اور وہ نیوزی لینڈ کے خلاف میچ کے لئےمکمل طور پر فٹ رہیں۔ٹیم مینجمنٹ اور میڈیکل سٹاف روہت شرما کی فٹنس پر گہری نظر رکھے ہوئے ہے اور ان کی شرکت کا حتمی فیصلہ میچ سے قبل ان کی حالت کے جائزے کے بعد کیا جائے گا۔
دوسری جانب ویرات کوہلی نے پریکٹس سیشن میں سپنرز کے خلاف بیٹنگ کی مشق کی جبکہ محمد شامی نے مکمل رفتار سے بائولنگ پریکٹس کی ، جس سے ظاہر ہوتا ہے کہ وہ بھی نیوزی لینڈ کے خلاف میچ کے لئے تیار ہیں۔شائقین اور ٹیم یہ امید کر رہے ہیں کہ روہت شرما جلد صحت یاب ہو کر میدان میں واپس آئیں گے اور اپنی قائدانہ صلاحیتوں سے ٹیم کو کامیابی کی راہ پر گامزن کریں گے۔واضح رہے کہ چیمپئنز ٹرافی 2025 میں بھارت اور نیوزی لینڈ کی کرکٹ ٹیمیں گروپ اے کا اپنا آخری میچ 2 مارچ کو دبئی میں کھیلیں گی۔ دونوں ٹیمیں گروپ اے سے سیمی فائنل کے لئے کوالیفائی کر چکی ہیں۔
Short Link: https://urdu.app.com.pk/urdu/?p=567074
