اسلام آباد۔27فروری (اے پی پی):لیبیا کے کشتی حادثے میں جاں بحق چھ پاکستانیوں کی میتیں وطن پہنچ گئیں، وفاقی وزیر برائے ہاؤسنگ اینڈ ورکس میاں ریاض حسین پیرزادہ نے اسلام آباد ایئرپورٹ پر میتیں وصول کیں۔و
زارت ہائوسنگ اینڈ ورکس کے ترجمان کے مطابق وفاقی وزیر میاں ریاض حسین پیرزادہ نے اسلام آباد ایئرپورٹ پر میتیں وصول کیں۔اس موقع پر انہوں نے کہا کہ5 فروری کو پیش آنے والے سانحے نے ملک کے کئی خاندانوں کو سوگ میں ڈال دیا، وہ لواحقین کے غم میں برابر کے شریک ہیں۔
انہوں نے کہا کہ حکومت متاثرین کے خاندانوں کے ساتھ ہر ممکن سطح پر کھڑی ہے، ہم نے تمام ضروری انتظامات کیے ہیں تا کہ متوفین کے جسد خاکی ان عزیزوں تک پہنچائے جا سکیں۔ ریاض حسین پیرزادہ نے کہا کہ باقی جاں بحق افراد کو جلد وطن واپس لائیں گے، لیبیا میں زندہ بچ جانے والے 37 پاکستانیوں کی واپسی کے لیے بھی کوششیں جاری ہیں۔
انہوں نے کہا کہ یہ وقت سبق سکھاتا ہے کہ غیر قانونی ذرائع سے یورپ جانے کی کوشش کتنی خطرناک ہو سکتی ہے۔وزیر ہائوسنگ نے نوجوانوں سے اپیل کی کہ وہ ایسے خطرناک راستے اختیار نہ کریں اور قانونی ذرائع کے ذریعے ہی بیرون ملک جانے کی کوشش کریں۔ ریاض حسین پیرزادہ نے متوفین کے لواحقین سے دلی ہمدردی کا اظہار بھی کیا۔
Short Link: https://urdu.app.com.pk/urdu/?p=566939
