پاکستانی میڈیا مسلہ کشمیر اور ملک کا مثبت تشخص اجاگر کرنے میں انتہائی اہم کردار ادا کر رہا ہے،سینیٹر فیصل جاوید کا سیمینار سے خطاب

اسلام آباد ۔ 10 اکتوبر (اے پی پی) سینٹ کی قائمہ کمیٹی برائے اطلاعات و نشریات کے چیئر مین سینٹر فیصل جاوید نے کہا ہے کہ پاکستانی میڈیا مسلہ کشمیر اور ملک کا مثبت تشخص اجاگر کرنے میں انتہائی اہم کردار ادا کر رہا ہے۔یہ بات انہوں نے جمعرات کو یہاں انسٹی ٹیوٹ آف پیس اینڈ ڈپلومیٹک سٹڈیز (آئی پی ڈی)کے زیر اہتمام ’تنازعہ کشمیر کو اجاگر کرنے میں میڈیا کی زمہ داری اور کردار‘کے موضوع پر سمینار سے خطاب کرتے ہوئے کہی۔سینیٹر فیصل جاوید اس موقع پر مہمان خصوصی تھے۔ سمینار میں سفیروں،سفارتکاروں،دانشوروں ،فیکلٹی ممبران اور طلباءنے کثیر تعداد میں شرکت کی۔سینیٹر فیصل جاوید نے کہا کہ پاکستانی میڈیا نے تنازعہ کشمیر کو عالمی سطح پر اجاگر کرنے میں زمہ دارانہ اور اہم کردار ادا کیا ہے۔اس سلسلے میں پاکستانی میڈیا کی کوششیں قابل تحسین اور اسے نظر انداز نہیں کیا جاسکتا۔انہوں نے کہا کہ میڈیا کو پاکستانی پیغام کو سرحدوں کے آر پار پہنچانے کیلئے انگریزی پیکج نشریات کی ضرورت ہے۔انہوں نے کہا کہ وزیر اعظم عمران خان نے حال ہی میں ان مسائل پر قابو پانے کیلئے ملائشیاءاور ترکی کے اشتراک سے انگریزی چینل کی تجویز پیش کی تھی۔فیصل جاوید نے کہا کہ وزیر اعظم عمران خان کشمیر اور مسلہ کشمیر کے سفیر ہیں،ہم اس مسلے کو عالمی سطح پر اجاگر کرنے کیلئے کوئی دقیقہ فرو گزاشت نہیں کرینگے۔