وزیراعظم عمران خان کی زیر صدارت سبسڈی کے نظام کو شفاف و منظم بنانے اور اس معاونت کو حقدار تک پہنچانے کو یقینی بنانے کے حوالے سے اجلاس

اسلام آباد ۔ 21 ستمبر (اے پی پی) وزیراعظم عمران خان نے کہا ہے کہ سرکاری خزانے سے فراہم کی جانے والی سبسڈیز کا مقصد معاشرے کے کمزور طبقوں کی معاونت اور سماجی و معاشی ترقی کا فروغ ہے، غیر مستحق افراد کا سبسڈیز کے نظام سے فائدہ اٹھانا نہ صرف سرکاری وسائل کا ضیاع ہے بلکہ حقداروں کی حق تلفی کا باعث بنتا ہے لہٰذا اس نظام میں اصلاحات حکومت کی اولین ترجیح ہے۔ وہ پیر کو یہاں حکومت کی جانب سے مختلف شعبوں میں فراہم کی جانے والی سبسڈی کے نظام کو شفاف اور منظم بنانے اور اس معاونت کو حقدار تک پہنچانے کو یقینی بنانے کے حوالے سے اجلاس کی صدارت کر رہے تھے۔ اجلاس میں وزیر برائے صنعت محمد حماد اظہر، مشیر خزانہ ڈاکٹر عبدالحفیظ شیخ، مشیر تجارت عبدالرزاق داو¿د، معاونین خصوصی ڈاکٹر ثانیہ نشتر، ڈاکٹر شہباز گل، سابق سیکرٹری خزانہ ڈاکٹر وقار مسعود و دیگر سینئر افسران نے شرکت کی۔ سابق وزیرِ خزانہ شوکت ترین، سلطان علی الانہ، عارف حبیب، ڈاکٹر اعجاز نبی ویڈیو لنک کے ذریعے اجلاس میں شریک ہوئے۔ وزیراعظم میڈیا آفس کے مطابق حکومت کی جانب سے مختلف شعبوں میں بالواسطہ اور بلاواسطہ فراہم کی جانے والی سبسڈیز کی مقدار اور اس نظام میں اصلاحات کے حوالے سے مختلف تجاویز پر غور کیا گیا۔ وزیرِاعظم عمران خان نے اجلاس سے خطاب کرتے ہوئے کہا کہ سبسڈی کے معاملے میں حکومت کی ترجیحات نہایت واضح ہیں۔ انہوں نے کہا کہ سرکاری خزانے سے فراہم کی جانے والی سبسڈیز کا مقصد معاشرے کے کمزور طبقوں کی معاونت اور سماجی و معاشی ترقی کا فروغ ہے۔ وزیراعظم نے کہا کہ غیر مستحق افراد کا سبسڈیز کے نظام سے فائدہ اٹھانا نہ صرف سرکاری وسائل کا زیاں ہے بلکہ حقداروں کی حق تلفی کا باعث بنتا ہے لہذا اس نظام میں اصلاحات حکومت کی اولین ترجیح ہے۔ اجلاس میں زیر غور آنے والی تجاویز پر بات کرتے ہوئے وزیراعظم نے تھنک ٹینک کی کاوشوں کو سراہتے ہوئے ہدایت کی کہ حکومتی ترجیحات کو مد نظر رکھتے ہوئے ہر قابل عمل تجویز کے حوالے سے روڈ میپ مرتب کیا جائے تاکہ مرحلہ وار ان پر عملدرآمد کیا جا سکے۔