بجلی اور گیس کے حوالے سے ترقیاتی کام تیزی سے جاری ہیں، ہمارا مقابلہ اپوزیشن سے نہیں مہنگائی سے ہے ، تنظیم سازی کے ذریعے لاہور میں پی ٹی آئی کو مزید مضبوط بنایاجائے گا، وفاقی وزیر توانائی حماداظہر کی پریس کانفرنس

بجلی اور گیس کے حوالے سے ترقیاتی کام تیزی سے جاری ہیں، ہمارا مقابلہ اپوزیشن سے نہیں مہنگائی سے ہے ، تنظیم سازی کے ذریعے لاہور میں پی ٹی آئی کو مزید مضبوط بنایاجائے گا، وفاقی وزیر توانائی حماداظہر کی پریس کانفرنس

لاہور۔22جنوری (اے پی پی):وفاقی وزیر توانائی حماداظہر نے کہاہے کہ لاہور میں بجلی اور گیس کے حوالے سے ترقیاتی کام تیزی سے جاری ہیں، صرف امرا کے علاقوں پر نہیں بلکہ شہر کے تمام علاقوں کی ترقی پریکساں توجہ دی جارہی ہے ۔

انہو ں نے ان خیالات کااظہار وزیر بلدیات پنجاب میاں محمود الرشید کے ہمراہ جناح ہال ایم سی ایل میں ایک پریس کانفرنس سے خطاب کرتے ہوئے کیا – حماد اظہر نے کہاکہ میاں محمود الرشید اور دیگر سینئر پارٹی رہنماں کی زیر قیادت لاہور میں تنظیم سازی کے ذریعے پی ٹی آئی کو مزید مضبوط بنایاجائے گا ۔

بلدیاتی انتخابات میں کامیابی کیلئے میاں محمود الرشید جیسے سینئر رہنماوں کے تجربے سے فائدہ اٹھائیں گے اور لاہور کو شفاف قیادت فراہم کریں گے ۔ وزیر بلدیات میاں محمود الرشید نے اس موقع پر کہاکہ بھر پور تیاری سے بلدیاتی انتخابات کے میدان میں اتریں گے ۔

اتفاق رائے سے آگے بڑھیں گے – انتخابات میں کامیابی کیلئے پارٹی کے اندرونی اختلافات ختم کرائے جائیں گے ۔ لاہور کی تنظیم کا اعلان اگلے چند روز میں کردیاجائے گا ۔دن رات ایک کرکے بلدیاتی انتخابات میں کامیابی حاصل کریں گے اور لاہور کو پی ٹی آئی کا مضبوط قلعہ بنائیں گے۔ ایک سوال کے جواب میں حماد اظہر نے کہاکہ ہمارا مقابلہ اپوزیشن سے نہیں مہنگائی سے ہے ۔

اپوزیشن جماعتوں کے کرپشن زدہ چہرے کو ہم نے کئی مرتبہ عوام کے سامنے بے نقاب کیاہے ۔ مہنگائی کے اثرات کو کم کرنے کیلئے مربوط کوششیں جاری ہیں ۔ حکومت کو مڈل کلاس طبقے کی مشکلات کا حساس ہے ۔ جس تیزی سے چیزوں کی قیمتیں اوپر گئی ہیں اسی تیزی سے نیچے بھی آئیں گی ۔وزیر بلدیات میاں محمودالرشید نے ایک سوال کے جواب میں بتایاکہ پنجاب لوکل گورنمنٹ ایکٹ اسمبلی میں پیش کردیاگیاہے ۔

اس پر تمام سیاسی جماعتوں میں اتفاق رائے پیدا کرنے کیلئے سٹیڈنگ کمیٹی میں روزانہ کی بنیاد پر بحث جاری ہے ۔رواں ہفتے کے اجلاس میں اس کی منظوری متوقع ہے ۔

حماد اظہر نے بتایاکہ لاہور میں سوئی گیس کی فرسودہ پائپ لائنوں اور بجلی کے ہزاروں ٹرانسفارمرز کو تبدیل کیاجارہاہے ۔ ترقیاتی کاموں کو ترتیب اور تیزی سے مکمل کیاجارہاہے -عمران خان کے وژن کے مطابق عوام کو تمام شہری سہولیات فراہم کرنے پر خصوصی توجہ دی جارہی ہے۔