آئی سی سی آئی اور پیلیڈیم گروپ کا پاکستان کی تجارت، برآمدات اور سرمایہ کاری کے فروغ کے لئے تعاون کا عزم

اسلام آباد۔24نومبر (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) اور پیلیڈیم گروپ نے پاکستان کی تجارت، برآمدات اور سرمایہ کاری کے فروغ کے لئے تعاون کا عزم کیا ہے۔ یہ عزم آئی سی سی آئی کے صدر سردار طاہر محمود اور پیلیڈیم گروپ کے ایک وفد کے درمیان چیمبر ہاؤس میں ڈائریکٹر اکنامک گروتھ الماری سونینن کی قیادت میں ملاقات کے دوران کیا گیا۔ اس موقع پر سینئر نائب صدر طاہر ایوب، نائب صدر محمد عرفان چوہدری اور پیلڈیم گروپ اسلام آباد کے سی ای او محمد وسیم بھی موجود تھے۔

الماری سونینن نے آئی سی سی آئی کی متحرک قیادت کو سراہتے ہوئے کہا کہ چیمبر عالمی شراکت داروں کے ساتھ پاکستان کے کاروباری رابطوں کو بڑھانے میں ایک متاثر کن کردار ادا کر رہا ہے جو کہ آج کی باہم جڑی ہوئی عالمی معیشت میں بہت ضروری ہے۔ انہوں نے مزید کہا کہ پیلیڈیم گروپ، تقریباً چھ دہائیوں کی عالمی موجودگی کے ساتھ، حکمت عملی وضع کرنے، ادارہ جاتی شراکت داری کی تعمیر، سرمائے کو متحرک کرنے، اور مختلف خطوں میں اعلیٰ اثر والے ترقیاتی پروگراموں کو نافذ کر کے پائیدار اقتصادی ترقی میں اپنا حصہ ڈال رہا ہے۔

انہوں نے بتایا کہ آئی سی سی آئی کے صدر کے ساتھ ان کی ملاقات انتہائی بصیرت انگیز ثابت ہوئی جس سے انہیں پاکستان کے برآمدی منظر نامے، ریگولیٹری ماحول اور سرمایہ کاری کے مواقع کے بارے میں وسیع معلومات حاصل ہوئیں۔ انہوں نے مینوفیکچرنگ، انفارمیشن ٹیکنالوجی، لاجسٹکس اور خدمات کے شعبوں کو ممکنہ شعبوں کے طور پر اجاگر کیا جہاں پیلیڈیم گروپ پاکستان کے نجی شعبے کے ساتھ مسابقت کو بڑھانے اور جدت پر مبنی ترقی کو فروغ دے سکتا ہے۔ آئی سی سی آئی کے صدر سردار طاہر محمود نے وفد کو پاکستان میں سرمایہ کاری کے لئے موافق ماحول، حکومتی اصلاحات، ریگولیٹری فریم ورک اور برآمدات کو فروغ دینے کے مضبوط عزم کے بارے میں آگاہ کیا۔

انہوں نے کہا کہ ون ونڈو آپریشنز، ڈیجیٹل کمپلائنس سسٹم اور بینکنگ سیکٹر میں اصلاحات جیسے اقدامات کو فعال طور پر آگے بڑھایا جا رہا ہے تاکہ کاروباری سرگرمیوں کو آسان بنایا جا سکے اور کاروبار کرنے کی لاگت کو کم کیا جا سکے۔انہوں نے اس بات پر زور دیا کہ پاکستان زراعت، زرعی پروسیسنگ، معدنیات، ٹیکسٹائل، انجینئرنگ اور ٹیکنالوجی سے چلنے والی صنعتوں میں ویلیو ایڈیشن میں اضافے کے وسیع مواقع فراہم کرتا ہے جنہیں ایک بڑی ہنر مند افرادی قوت اور سٹریٹجک جغرافیائی محل وقوع کی حمایت حاصل ہے۔

انہوں نے وفد کو یقین دلایا کہ آئی سی سی آئی قابل اعتماد بین الاقوامی شراکت داروں کی مدد کے لئے پرعزم ہے۔ملاقات کا اختتام اس باہمی عہد کے ساتھ ہوا کہ عالمی ویلیو چینز میں پاکستان کی شراکت داری کو مضبوط بنانے کے ساتھ ساتھ برآمد کنندگان، ایس ایم ایز اور ابھرتی ہوئی صنعتوں کے لئے مواقع کو بڑھایا جائے گا۔