آئی جی اسلام آباد محمد سہیل چوہدری کا تاریخی تھانہ گولڑہ کا دورہ

اسلام آباد۔26ستمبر (اے پی پی):انسپکٹر جنرل آف پولیس (آئی جی پی) اسلام آباد کیپیٹل ٹیریٹری (آئی سی ٹی) محمد سہیل چوہدری نے تاریخی گولڑہ پولیس اسٹیشن کا دورہ کیا اور شہریوں کو فراہم کی جانے والی سہولیات اور پولیس خدمات کا جائزہ لیا۔پولیس حکام کے مطابق آئی جی نے پولیس اسٹیشن میں تعینات افسران اور اہلکاروں سے ملاقات کی اور مختلف انتظامات، خاص طور پر ‘فرنٹ ڈیسک’ پر شہریوں کو دستیاب سہولیات کا معائنہ کیا۔انہوں نے پولیس اسٹیشن کے عملے سے بھی بات چیت کی اور فرائض کی انجام دہی کے دوران انہیں درپیش مسائل اور مشکلات کے بارے میں دریافت کیا۔انہوں نے متعلقہ افسران کو ہدایت کی کہ خدمات کی فراہمی کو مزید بہتر بنانے اور پولیس کی خدمات کو شہریوں کے لیے مزید آسان اور قابلِ رسائی بنانے کے لیے ضروری اقدامات کئے جائیں۔آئی جی محمد سہیل چوہدری نے اس بات پر زور دیا کہ پولیس اسٹیشن آنے والے لوگوں کو بروقت اور مؤثر معاونت فراہم کی جانی چاہیے، جبکہ افسران کو اپنے فرائض پیشہ ورانہ اور ذمہ دارانہ انداز میں سرانجام دینے چاہئیں۔