آئی ٹی برآمدات میں رواں مالی سال 20 فیصد کا نمایاں اضافہ

                                                                                                                                                                                                                                                                         اسلام آباد۔18فروری (اے پی پی):انفارمیشن ٹیکنالوجی (آئی ٹی ) کی برآمدات میں جاری مالی سال کے پہلے 7 ماہ میں سالانہ بنیادوں پر 20 فیصد کا نمایاں اضافہ ریکارڈ کیا گیا ہے۔ پاکستان بیورو برائے شماریات اور سٹیٹ بینک کے اعدادوشمار کے مطابق مالی سال کے پہلے 7 ماہ میں آئی ٹی برآمدات کا حجم 2.610 ارب ڈالر ریکارڈ کیا گیا جو گزشتہ مالی سال کی اسی مدت کے مقابلے میں 20 فیصد زیادہ ہے۔ گزشتہ مالی سال کی اسی مدت میں آئی ٹی مصنوعات کی برآمدات کا حجم 2.179 ارب ڈالر ریکارڈ کیا گیا تھا۔

جنوری میں آئی ٹی برآمدات کا حجم 374 ملین ڈالر ریکارڈ کیا گیا جو گزشتہ سال جنوری کے 313 ملین ڈالر کے مقابلے میں 19 فیصد زیادہ ہے۔ دسمبر کے مقابلے میں جنوری میں آئی ٹی مصنوعات کی برآمدات میں ماہانہ بنیادوں پر 14 فیصد کی کمی ریکارڈ کی گئی۔ دسمبر میں آئی ٹی برآمدات کا حجم 437 ملین ڈالر ریکارڈ کیا گیا تھا جو جنوری میں کم ہو کر 374 ملین ڈالر ہوگیا۔ آئی ٹی برآمدات میں گزشتہ کئی ماہ سے عمومی اضافے کا رجحان دیکھنے میں آ رہا ہے، جولائی 2025 سے جنوری 2026 تک حاصل ہونے والے 2.61 ارب ڈالر آئی سی ٹی شعبے کو خدمات کے تمام شعبوں میں سرفہرست رکھتے ہیں۔

کاروباری خدمات کا شعبہ 1.21 ارب ڈالر کے ساتھ دوسرے نمبر پر رہا۔ماہرین کے مطابق آئی سی ٹی شعبے کی یہ مضبوط کارکردگی نہ صرف زرمبادلہ کے ذخائر میں اضافے کا باعث بن رہی ہے بلکہ نوجوانوں کے لیے روزگار کے نئے مواقع بھی پیدا کر رہی ہے۔ یہ رجحان پاکستان کی معیشت میں آئی سی ٹی شعبے کی بڑھتی ہوئی اہمیت کو اجاگر اور مستقبل میں مزید ترقی کی نوید دے رہا ہے۔