اسلام آباد ویمن چیمبر آف کامرس اینڈ انڈسٹری میں 80 واں یوم آزادی محب وطن فیملی فیسٹیول کے ساتھ منا یا گیا

اسلام آباد۔15اگست (اے پی پی):اسلام آباد ویمن چیمبر آف کامرس اینڈ انڈسٹری (آئی ڈبلیو سی سی آئی ) کے زیر اہتمام کیپٹل ڈویلپمنٹ اتھارٹی ، میونسپل کارپوریشن اسلام آباد فورتھ پلر میڈیا واچ ڈاگ کے اشتراک سے پاکستان کے 80ویں یوم آزادی کو قومی جوش و جذبے اور حب الوطنی کے جذبے کے ساتھ منانے کے لیے ایک فیملی فیسٹیول کا انعقاد کیا گیا ۔تقریب کی میزبانی ظفر بختاوری نے کی جبکہ حبیب بینک لمیٹڈ نے بھی میلے میں شرکت کی۔ تقریب میں خواتین، بچوں اور شہریوں کی بڑی تعداد نے شرکت کی۔

میلے میں قومی گیت پیش کیے گئے جس نے ماحول کو حب الوطنی کے جوش سے بھر دیا۔ سبز اور سفید لباس میں ملبوس بچوں نے یوم آزادی کا جشن مناتے ہوئے قومی پرچم لہرائے۔ اس موقع پر بچوں اور خاندانوں کے لیے تفریحی سرگرمیوں کا بھی اہتمام کیا گیا جنہوں نے فیسٹیول سے بھرپور لطف اٹھایا۔اس موقع پر آئی ڈبلیو سی سی آئی کی چیئرپرسن ثمینہ فضل نے کہا کہ یوم آزادی قوم کو متحد ہونے اور پاکستان کی ترقی، خوشحالی، امن اور استحکام کے لیے اپنا کردار ادا کرنے کی یاد دلاتا ہے۔انہوں نے اس بات پر زور دیا کہ خواتین کو بااختیار بنانا قومی ترقی کے لیے ضروری ہے ۔ انہوں نے خواتین کے لیے اقتصادی اور کاروباری سرگرمیوں میں حصہ لینے کے لیے زیادہ مواقع فراہم کرنے پر زور دیا۔ثمینہ فضل نے سی ڈی اے کے تعاون اور بہترین انتظامات پر خصوصی ستائش کرتے ہوئے کہا کہ اس کے تعاون سے یوم آزادی فیملی فیسٹیول کو کامیاب اور یادگار بنانے میں مدد ملی ہے۔

میلے میں کھانے پینے کے مختلف سٹالز، بچوں اور خاندانوں کے لیے خصوصی تفریحی سرگرمیاں بھی شامل کی گئیں۔آئی ڈبلیو سی سی آئی کی سابق صدر فریدہ راشد، عالیہ اکرام، رضوانہ آصف، افشاں ذیشان اور فورتھ پلر میڈیا واچ ڈاگ کی صدر فرحت فاطمہ، خواتین، اہل خانہ اور شہریوں کی بڑی تعداد کے ساتھ اس تقریب میں شرکت کرنے والی اہم شخصیات میں شامل تھیں۔ فیسٹیول کے شرکا نے پاکستان کی ترقی، خوشحالی، امن و استحکام کے لیے نیک خواہشات کا اظہار کیا اور ملک کا 80 واں یوم آزادی بھر پور قومی جوش و جذبہ اور حب الوطنی کے جذبے کے ساتھ منایا۔