این سی سی آئی اے ، سائبر کرائم کی شکایات کی سہولت کے لیے پاکستان بھر میں ایمرجنسی 15 کال سسٹمز سے منسلک

اسلام آباد۔17اکتوبر (اے پی پی):ڈائریکٹر جنرل نیشنل سائبر کرائم انویسٹی گیشن ایجنسی (این سی سی آئی اے) سید علی ناصر رضوی نے کہا ہے کہ مختلف صوبوں اور بڑے شہروں میں کام کرنے والے پولیس ایمرجنسی 15 کال سسٹمز کو این سی سی آئی اے سے منسلک کر دیا گیا ہے تاکہ شہریوں کو سائبر کرائم کی شکایات کی اطلاع دینے میں آسانی ہو۔

این سی سی آئی اے کے حکام کے مطابق اس انضمام سے پولیس ایمرجنسی 15 سروسز کے ذریعے موصول ہونے والی سائبر کرائم سے متعلق شکایات ضروری کارروائی کے لیے این سی سی آئی اے کو بھیج دی جائیں گی۔ سید علی ناصر رضوی نے این سی سی آئی اے کے ساتھ مختلف صوبوں اور بڑے شہروں میں ایمرجنسی کال سسٹم کے کنکشن کو سائبر کرائم شکایتی خدمات تک عوام کی رسائی کو بہتر بنانے میں ایک اہم پیشرفت قرار دیا۔

انہوں نے کہا کہ یہ انتظام شہریوں کو موجودہ ایمرجنسی کال سسٹم کے ذریعے سائبر کرائم کے واقعات کی اطلاع دینے میں مدد کرے گا اور اس بات کو یقینی بنائے گا کہ ان کی شکایات متعلقہ ایجنسی تک پہنچیں۔اس اقدام کا مقصد پولیس ایمرجنسی سروسز اور این سی سی آئی اے کے درمیان ہم آہنگی کو بہتر بنانا اور شہریوں کے لیے شکایت کے عمل کو مزید آسان بنانا ہے۔