ایک کروڑ ڈالر کے منصوبے میں ایک ہزار سے زائد گرین گرانٹس، 5 ہزار طلبہ کی موسمیاتی تربیت کی تجویز

اسلام آباد۔1اکتوبر (اے پی پی):پاکستان میں ایک کروڑ ڈالر مالیت کے یوتھ کلائمیٹ ایکشن گرانٹس منصوبے کی تجویز دی گئی ہے جس کے تحت ایک ہزار سے زائد گرین مائیکرو گرانٹس فراہم کرنے اور 5 ہزار یونیورسٹی طلبہ کی موسمیاتی اقدامات سے متعلق استعداد کار بڑھانے کا منصوبہ ہے۔

ویلتھ پاکستان کو دستیاب دستاویزات کے مطابق مجوزہ اقدام میں نوجوانوں کے موسمیاتی منصوبوں کے لیے مالی معاونت کے ساتھ تکنیکی رہنمائی، موسمیاتی قیادت کی تربیت اور ڈیجیٹل یوتھ کلائمیٹ پورٹل کا قیام شامل ہوگا۔پنجاب کے محکمہ تحفظ ماحولیات و موسمیاتی تبدیلی (ای پی سی سی ڈی) کو منصوبے کے لیے مرکزی ادارے کے طور پر نامزد کیا گیا ہے۔مجوزہ پروگرام کے تحت ایک ہزار سے زائد گرین مائیکرو گرانٹس فراہم کرنے اور 5 ہزار یونیورسٹی طلبہ کی استعداد کار بڑھانے کا تصور پیش کیا گیا ہے،اس کی مجوزہ سرگرمیوں میں یوتھ کلائمیٹ ایکشن گرانٹس، ڈیجیٹل یوتھ کلائمیٹ پورٹل، تکنیکی رہنمائی، موسمیاتی قیادت کی تربیت، قدرتی طریقوں پر مبنی حل، بارش کے پانی کو ذخیرہ کرنا، کمیونٹی کمپوسٹنگ، شہری علاقوں میں شجرکاری اور پانی کا تحفظ شامل ہیں۔

دستاویز میں یونیورسٹی نیٹ ورکس اور موسمیاتی تبدیلی کے کلبوں کو منصوبے پر عمل درآمد کے مراکز کے طور پر شناخت کیا گیا ہے، تاہم دستیاب متن میں شراکت دار اداروں کی تفصیلی ذمہ داریوں کی وضاحت نہیں کی گئی۔منصوبے کے لیے ایک کروڑ ڈالر کا مجوزہ بجٹ رکھا گیا ہے۔ یہ مجوزہ اقدام پاکستان کے لیے عالمی بینک کے مالی سال 2026 سے مالی سال 2035 کے کنٹری پارٹنرشپ فریم ورک کے تحت زیرعمل منصوبوں کا حصہ ہے