سردار اویس احمد خان لغاری کی کوہاٹ دھماکے کی شدید مذمت

اسلام آباد۔18ستمبر (اے پی پی):وفاقی وزیر توانائی سردار اویس احمد خان لغاری نے کوہاٹ دھماکے کی شدید مذمت کرتے ہوئے قیمتی انسانی جانوں کے ضیاع پر افسوس کا اظہار کیا ہے۔ جمعہ کو جاری بیان میں انہوں نے کوہاٹ دھماکے کے شہداء کے اہل خانہ سے اظہار تعزیت کرتے ہوئے کہا کہ دھماکے میں زخمی افراد کی جلد صحت یابی کے لیے دعا گو ہیں۔

اویس لغاری نے دعا کی کہ اللہ تعالیٰ شہداء کے درجات بلند کرے اور لواحقین کو صبرِ جمیل عطا فرمائے۔وفاقی وزیر نے کہا کہ دہشت گردی کے بزدلانہ واقعات قوم کے عزم اور حوصلے کو متزلزل نہیں کر سکتے، فتنہ الخوارج کے خلاف قومی جدوجہد میں پوری قوم سکیورٹی فورسز کے ساتھ ہے۔

وفاقی وزیر نے کہا کہ دہشت گردی کے مکمل خاتمے تک سکیورٹی فورسز کی جدوجہد جاری رہے گی، دہشت گرد اپنے مذموم عزائم میں کبھی کامیاب نہیں ہوں گے۔ اویس لغاری نے کہا کہ پاکستان کے امن و استحکام کو نقصان پہنچانے کی ہر کوشش ناکام بنائی جائے گی۔