سپیکر قومی اسمبلی سردار ایاز صادق کی زیر صدارت حکومت اور اپوزیشن اراکین کے درمیان مذاکرات

اسلام آباد۔2اکتوبر (اے پی پی):سپیکر قومی اسمبلی سردار ایاز صادق کی زیر صدارت حکومت اور اپوزیشن اراکین کے درمیان مذاکرات جمعہ کو پارلیمنٹ ہائوس میں ہوئے ۔ قومی اسمبلی سیکرٹریٹ کے مطابق سپیکر قومی اسمبلی نےحکومت اور اپوزیشن کے اراکین کا سپیکر چیمبر میں آمد پر خیرمقدم کیا۔

انہوں نے کہا کہ میں صرف ثالث کا کردار ادا کر رہا ہوں، اللہ تعالیٰ سے دعا ہے کہ مذاکرات کامیابی سے ہمکنار ہوں، میرا آفس مسائل کے حل اور مذاکرات کیلئے ہمیشہ کھلا ہے، میں نے مسائل کے حل کیلئے اپوزیشن کو ہمیشہ مذکرات کی دعوت دی ہے۔

سردار ایاز صادق نے کہا کہ اختلاف رائے اور مسائل کے حل کا واحد راستہ مذاکرات ہیں، عہدے اور دفاتر عارضی ہوتے ہیں، پارلیمان ہی وہ واحد فورم ہے جہاں مسائل کا حل نکالا جا سکتا ہے۔

اجلاس میں وفاقی وزراء امیر مقام، رانا ثناء اللہ، محسن رضا نقوی، طارق فضل چوہدری اور وزیر مملکت طلال چوہدری، پیپلز پارٹی کی طرف سے سینیٹر شیری رحمان، ارکان قومی اسمبلی سید نوید قمر اور اعجاز حسین جاکھرانی جبکہ اپوزیشن رہنمائوں میں بیرسٹر گوہر خان، راجہ ناصر عباس ،ملک عامر ڈوگر اور سابق سپیکر اسد قیصر کے علاوہ سلمان اکرم راجہ نے اجلاس میں شرکت کی ۔