سیالکوٹ کا 7رکنی تجارتی وفد ملائیشیا روانہ

سیالکوٹ۔ 30 اگست (اے پی پی):سیالکوٹ سے ایک 7 رکنی تجارتی وفد ملائیشیا روانہ ہو گیا ہے جس کا مقصد شہر کی برآمدی مصنوعات کے لیے نئی بین الاقوامی منڈیاں تلاش کرنا اور غیر ملکی کاروباری برادری کے ساتھ تجارتی تعلقات کو مضبوط بنانا ہے۔سیالکوٹ چیمبر آف کامرس اینڈ انڈسٹری کی میلوں اور نمائشوں سے متعلق محکمانہ کمیٹی کے چیئرمین قیصر بیگ نے اے پی پی سے گفتگو کرتے ہوئے کہا کہ ملائیشیا کا یہ دورہ اگست کے مہینے میں چیمبر کا تیسرا بیرونِ ملک تجارتی دورہ ہے۔

اس سے قبل سیالکوٹ چیمبر کے وفود جنوبی افریقااور جنوبی کوریا کا دورہ کر چکے ہیں۔چیئرمین سیالکوٹ چیمبر کمیٹی برائے میلہ و نمائش نے بتایا کہ وفد اپنے دورے کے دوران کاروباری رہنماؤں اور درآمد کنندگان کے ساتھ ملاقاتیں کرے گا۔قیصر بیگ نے کہا کہ باقاعدگی سے بیرونِ ملک تجارتی وفود بھیجنے کا مقصد سیالکوٹ کی مصنوعات کے لیے نئی عالمی منڈیاں تلاش کرنا، بین الاقوامی کاروباری اداروں کے ساتھ تعلقات کو مستحکم کرنا اور پاکستانی برآمدات میں اضافہ کرنا ہے۔

قیصر بیگ نے کہا کہ ملائیشیا کا یہ دورہ بین الاقوامی کاروباری روابط کو وسعت دینے کے لیے چیمبر کی جاری کوششوں کا حصہ ہے۔دورے کے دوران، وفد ملائیشیا کے کاروباری رہنماؤں اور اداروں کے ساتھ ملاقاتیں کرے گا تاکہ تعاون کے ممکنہ شعبوں کا جائزہ لیا جا سکے اور سیالکوٹ کی صنعتوں کے لیے کاروبار کے نئے مواقع کی نشاندہی کی جا سکے۔توقع ہے کہ وفد سیالکوٹ کی برآمدی مصنوعات کے فروغ، کاروباری سطح پر رابطوں کے قیام اور پاکستان اور ملائیشیا کے درمیان تجارت بڑھانے کے امکانات تلاش کرنے پر توجہ مرکوز کرے گا۔