صدر مملکت کا ڈیرہ اسماعیل خان میں فتنہ الخوارج کے خلاف کارروائی پر سکیورٹی فورسز کو خراج تحسین

اسلام آباد۔4اکتوبر (اے پی پی):صدر مملکت آصف علی زرداری نے ڈیرہ اسماعیل خان میں فتنہ الخوارج کے 8 دہشت گردوں کو انٹیلی جنس بیسڈ کارروائی میں جہنم واصل کرنے پر سکیورٹی فورسز کو خراج تحسین پیش کیا ہے۔اتوار کو ایوان صدر کے میڈیا ونگ سے جاری بیان کے مطابق صدر مملکت نےآپریشن کے دوران بھاری اسلحہ و گولہ بارود قبضے میں لینے اور فتنہ الخوارج کے تین اہم سرغنوں کے خاتمے پر سکیورٹی اہلکاروں کی بھرپور حوصلہ افزائی کی۔

صدر مملکت نے کہا کہ بیرونی سرپرستی اور مقامی سہولت کاروں کی مدد سے سرگرم عمل دہشت گردوں کے ناپاک عزائم کو ہرگز کامیاب نہیں ہونے دیں گے۔عزم استحکام وژن کے تحت فتنہ الخوارج کے خلاف کارروائیاں پوری قوت کے ساتھ جاری رکھی جائیں۔صدر زرداری نے کہا کہ ملک سے دہشت گردی کے جڑ سے خاتمے کے لئے قومی عزم غیر متزلزل ہے،پوری قوم سکیورٹی فورسز کے بہادر سپوتوں کو ملکی امن و سلامتی کی خاطر قربانی پر سلام پیش کرتی ہے۔