محکمہ زراعت پنجاب نے گندم کی فی ایکڑ زیادہ پیداوار کیلئے آبپاشی کا شیڈول جاری کر دیا

لاہور۔2دسمبر (اے پی پی):محکمہ زراعت پنجاب نے گندم کی فی ایکڑ زیادہ پیداوار کیلئے آبپاشی کا شیڈول جاری کر دیا۔ ترجمان محکمہ زراعت پنجاب نے کہا ہے کہ گندم کی فصل کے لئے بروقت اور مناسب آبپاشی فی ایکڑ زیادہ پیداوار کے لئے نہایت اہم ہے، آبپاشی کا وقت اس بات پر بھی منحصر ہوتا ہے کہ گندم کی کاشت کس فصل کے بعد کی گئی ہے، اس کے علاوہ پچھیتی کاشت گندم اور تھل کے علاقوں میں کاشتہ گندم کیلئے آبپاشی کا شیڈول موسمی حالات کے پیشِ نظر بنایا جاتا ہے۔

ترجمان محکمہ زراعت پنجاب نے سوموار کو جاری بیان میں کہا کہ کپاس مکئی اور گنے کی کاشت کے بعد گندم کی کاشتہ فصل میں پہلی آبپاشی شگوفے نکلتے وقت یعنی بوائی کے 20تا25 دن، دوسری آبپاشی گوبھ کے وقت 80تا90 دن اور تیسری آبپاشی دانہ بننے کی ابتدا یعنی بوائی کے 125تا130 دن کے بعد کی جانی چاہیے جبکہ دھان کی فصل کے بعد گندم کی کاشت کی صورت میں پہلی آبپاشی بوائی کے 35تا45دن، دوسری آبپاشی گوبھ کے وقت یعنی بوائی کے 80تا90 دن، اور تیسری آبپاشی بوائی کے 125تا130 دن کے بعد ضروری ہے،پچھیتی کاشتہ گندم کو پہلا پانی بوائی کے 25 تا30 دن بعد،دوسری آبپاشی70 تا80 دن بعد جبکہ تیسرا پانی بوائی کے110 تا115 دن بعد کرنی چاہیے۔

آبپاشی کا بروقت انتظام گندم کی افزائش کو یقینی بناتا ہے اور فصل کو موسمی تغیرات سے محفوظ رکھتا ہے، تھل کے علاقہ جات میں گندم کی فصل کو مقامی موسمی حالات کے پیشِ نظر پہلا پانی بوائی کے 20 تا25 دن بعد،دوسرا پانی فصل کی شاخیں نکلتے وقت یعنی بوائی سے 40 تا45 دن بعد،تیسرا پانی گوبھ کے وقت یعنی بوائی کے70 تا75 دن بعد، چوتھا پانی پھول بنتے وقت یعنی بوائی کے90 تا95 دن بعد،پانچواں پانی دانہ بنتے وقت یعنی بوائی کے110 تا115 دن بعد اور چھٹا پانی دانے بھرتے وقت یعنی بوائی کے130 تا135 دن بعد دینا چاہیے۔

ترجمان محکمہ زراعت پنجاب نے مزید کہا کہ موسمی حالات اور پانی کی فراہمی کو مدنظر رکھتے ہوئے گندم کی فصل میں آبپاشی کا صحیح وقت منتخب کیا جائے تاکہ فصل کو نقصان سے بچایا جا سکے اور پیداوار میں خاطر خواہ اضافہ کیا جا سکے،پانی کی مناسب مقدار کے استعمال سے پیداواری لاگت میں کمی او رگندم کی فی ایکڑ پیداوار میں اضافہ ممکن ہوتاہے۔