محکمہ زراعت کی ستمبر میں كاشتكاروں كو سرسوں کے ساگ کی کاشت کی ہدایت

سیالکوٹ ۔ 04 ستمبر (اے پی پی):محکمہ زراعت نے ستمبر میں كاشتكاروں كو سرسوں کے ساگ کی کاشت کی ہدایت کی ہے۔

اسسٹنٹ ڈائریکٹر محکمہ زراعت سمبڑیال ڈاکٹر افتخار حسین بھٹی نے کہا ہے کہ 15 ستمبر سے اگیتی سبزی سرسوں کا ساگ کاشت کیا جاسکتا ہے۔انہوں نے کہا کہ خاص طور پر جو لوگ گندم کاشت کرنا چاہتے ہیں اور ان کے کھیت ابھی خالی ہیں وہ کاشتکار فوراً ہل چلا کر زمین کو اچھی طرح تیار کرلیں ،اگر سرسوں کے بیج کھیلوں پر کاشت کریں تو زیادہ اچھی پیداوار حاصل کی جاسکتی ہے۔ انہوں نے مزید کہا کہ سرسوں کاشت سے پہلے کھیت میں ایک بوری ڈی اے پی اور آدھی بوری یوریا استعمال کریں۔انہوں نے کہا کہ یہ سبزی ڈیڑھ ماہ میں تیار ہوجاتی ہے اس لیے کٹائی کے بعد گندم بھی کاشت کی جاسکتی ہے۔یاد رہے پاکستان اور انڈیا کے پنجاب میں ساگ بڑے شوق سے کھایا جاتا ہے اور اگیتی فصل ہو تو اچھا منافع دیتا ہے۔