نائب وزیراعظم و وزیر خارجہ اسحاق ڈار کی ریجنل -4 کے وزارتی اجلاس میں شرکت، فلسطینی ریاست کے قیام کے حق کی حمایت کا اعادہ کیا

نیویارک ۔22ستمبر (اے پی پی):نائب وزیراعظم و وزیر خارجہ سینیٹر محمد اسحاق ڈار نے اقوام متحدہ کی جنرل اسمبلی کے 81ویں اجلاس کے موقع پر ریجنل -4 (R-4) کے وزارتی اجلاس میں شرکت کی۔ اجلاس میں ترکیہ ،سعودی عرب اور مصر کے وزرا خارجہ نے بھی شرکت کی۔ منگل کو دفتر خارجہ کے ترجمان کی جانب سے جاری بیان کے مطابق نائب وزیراعظم و وزیر خارجہ نے ریجنل-4 فریم ورک کے ساتھ پاکستان کے مضبوط عزم کا اعادہ کرتے ہوئے علاقائی امن و خوشحالی کے فروغ کیلئے مسلسل رابطے کی ضرورت پر زور دیا۔ انہوں نے خطے کی تازہ صورتحال پر بھی تبادلہ خیال کیا اور صورتحال کے پرامن حل کیلئے کی جانے والی کوششوں کی مکمل حمایت کا اظہار کیا۔ وزرا نے فلسطینی عوام کے جائز حقوق بشمول خودمختاری کے ان کے ناقابل تنسیخ حق اور 4 جون 1967ء کے خطوط کی بنیاد پر القدس الشریف دارالحکومت کے ساتھ ایک آزاد ، خودمختار، قابل عمل اور متصل ریاست فلسطین کے قیام کے حق کی حمایت کا اعادہ کیا جو اقوام متحدہ کی سلامتی کونسل کی قراردادوں کے مطابق ہے