نیشنل یونیورسٹی آف سائنسز اینڈ ٹیکنالوجی بلوچستان کیمپس کوئٹہ کے 45 ہونہار طلبہ و طالبات بیف سکالرشپ کے لئے میرٹ پر منتخب

کوئٹہ۔ 23 ستمبر (اے پی پی):بلوچستان ایجوکیشن انڈومنٹ فنڈ کے چیف ایگزیکٹو آفیسر خالد ماندائی نے نیشنل یونیورسٹی آف سائنسز اینڈ ٹیکنالوجی، بلوچستان کیمپس کوئٹہ کے مختلف بی ایس، ایم ایس اور ایم فل پروگرامز میں زیرِ تعلیم 45 ہونہار طلبہ و طالبات کو بیف سکالرشپ پروگرام کے لئے میرٹ پر منتخب ہونے پر دلی مبارکباد پیش کی ہے۔چیف ایگزیکٹو آفیسر بلوچستان ایجوکیشن انڈومنٹ فنڈ خالد ماندائی نے کہا کہ بلوچستان کے باصلاحیت نوجوان اپنی محنت، عزم اور قابلیت کے ذریعے اعلیٰ تعلیم کے میدان میں نمایاں مقام حاصل کر سکتے ہیں۔ بیف کی جانب سے میرٹ پر منتخب طلبہ و طالبات کو تعلیمی معاونت فراہم کرنے کا مقصد انہیں اعلیٰ اور معیاری تعلیم کے حصول میں سہولت فراہم کرنا اور مالی مشکلات کے باعث ان کی تعلیمی پیش رفت کو متاثر ہونے سے بچانا ہے۔انہوں نے کہا کہ بلوچستان کے نوجوان صوبے کا قیمتی اثاثہ ہیں اور اعلیٰ تعلیمی اداروں تک ان کی رسائی بلوچستان کے علمی، سائنسی اور پیشہ ورانہ مستقبل کے لیے نہایت اہم ہے۔ بیف مختلف سکالرشپ پروگرامز کے ذریعے باصلاحیت اور مستحق طلبہ و طالبات کی حوصلہ افزائی اور تعلیمی معاونت جاری رکھے ہوئے ہے۔نیشنل یونیورسٹی آف سائنسز اینڈ ٹیکنالوجی بلوچستان کیمپس کوئٹہ میں زیرِ تعلیم منتخب 45 طلبہ و طالبات مختلف تعلیمی پروگرامز میں اپنی تعلیم جاری رکھے ہوئے ہیں، جن میں بی ایس کمپیوٹر سائنس، بیچلر آف انجینئرنگ سول انجینئرنگ، بی ایس مصنوعی ذہانت، ایم ایس کمپیوٹر سائنس، ایم فل، ایم ایس سول انجینئرنگ، ایم فل اور ایم ایس مائننگ انجینئرنگ، ایم فل شامل ہیں۔چیف ایگزیکٹو آفیسر بلوچستان ایجوکیشن انڈومنٹ فنڈ نے کہا کہ وزیراعلیٰ بلوچستان میر سرفراز احمد بگٹی کے تعلیم دوست وژن کے تحت صوبے میں معیاری تعلیم کے فروغ، میرٹ کی حوصلہ افزائی اور نوجوانوں کے لیے اعلیٰ تعلیمی مواقع میں اضافے کے لیے عملی اقدامات جاری ہیں۔ بلوچستان ایجوکیشن انڈومنٹ فنڈ بھی اسی وژن کے تحت مختلف سکالرشپ پروگرامز کے ذریعے طلبہ و طالبات کو تعلیمی معاونت فراہم کر رہا ہے۔خالد ماندائی نے کہا کہ کمپیوٹر سائنس، مصنوعی ذہانت، سول انجینئرنگ اور مائننگ انجینئرنگ جیسے اہم اور جدید شعبوں میں اعلیٰ تعلیم حاصل کرنے والے نوجوان بلوچستان کے مستقبل کی تعمیر میں اہم کردار ادا کر سکتے ہیں۔ ایسے باصلاحیت طلبہ و طالبات کو میرٹ کی بنیاد پر تعلیمی معاونت فراہم کرنا انہیں اپنی صلاحیتوں کو مزید نکھارنے اور جدید علمی و پیشہ ورانہ میدانوں میں آگے بڑھنے کے مواقع فراہم کرتا ہے۔انہوں نے منتخب طلبہ و طالبات پر زور دیا کہ وہ اپنی تعلیم میں محنت، نظم و ضبط اور مستقل مزاجی کو برقرار رکھیں اور حاصل ہونے والے تعلیمی مواقع سے بھرپور استفادہ کرتے ہوئے مستقبل میں بلوچستان اور پاکستان کی ترقی میں اپنا مؤثر کردار ادا کریں۔ بلوچستان ایجوکیشن انڈومنٹ فنڈ کی جانب سے نیشنل یونیورسٹی آف سائنسز اینڈ ٹیکنالوجی بلوچستان کیمپس کوئٹہ کے تمام 45منتخب طلبہ و طالبات اور ان کے والدین کو دلی مبارکباد پیش کی گئی ہے اور ان کے روشن، کامیاب اور بامقصد مستقبل کے لیے نیک خواہشات کا اظہار کیا گیا ہے۔