وزیراعظم شہباز شریف کا ایرانی وزیر خارجہ سے ٹیلیفونک رابطہ، ہمشیرہ کے انتقال پر تعزیت کی

اسلام آباد۔2اکتوبر (اے پی پی):وزیراعظم محمد شہباز شریف نے ایران کے وزیر خارجہ سید عباس عراقچی سے ٹیلیفون پر گفتگو کی اور ان کی ہمشیرہ کے انتقال پر دلی تعزیت اور گہرے افسوس کا اظہار کیا۔وزیراعظم آفس کے میڈیا ونگ سے جاری بیان کے مطابق وزیراعظم شہباز شریف نے سید عباس عراقچی اور ان کے اہلخانہ سے دلی ہمدردی کا اظہار کرتے ہوئے مرحومہ کے لئے دعائے مغفرت کی۔

وزیراعظم نے دعا کی کہ اللہ تعالیٰ مرحومہ کو جوارِ رحمت میں جگہ عطا فرمائے اور سوگوار خاندان کو یہ ناقابلِ تلافی نقصان برداشت کرنے کے لئے صبر و استقامت عطا فرمائے۔ایرانی وزیر خارجہ سید عباس عراقچی نے اس ہمدردانہ اور مخلصانہ جذبے اور مشکل وقت میں ان کے غم میں شریک ہونے پر وزیراعظم شہباز شریف کا شکریہ ادا کیا۔