وزیراعظم کی ہدایت پر صومالیہ میں جاں بحق پاکستانیوں شہریوں کی میتوں کی پاکستان منتقلی کے انتظامات جاری ، میتیں ایتھوپین دارالحکومت ادیس ابابا پہنچ گئیں

اسلام آباد۔3اکتوبر (اے پی پی):وزیراعظم محمد شہباز شریف کی ہدایت پر صومالیہ میں جاں بحق پاکستانیوں شہریوں کی میتوں کی پاکستان منتقلی کے انتظامات جاری ہیں، اس سلسلے میں جاں بحق پاکستانی شہریوں کی میتیں ایک گھنٹہ قبل ایتھوپیا کے دارالحکومت ادیس ابابا پہنچ گئی ہیں۔

وزیراعظم آفس کے میڈیا ونگ سے جاری بیان کے مطابق ایتھوپین ایئرلائنز کا عملہ میتوں کے تابوتوں اور میتوں کی ضروری تیاری کا جائزہ لے رہا ہے، جس کے بعد کراچی جانے والی پرواز میں میتوں کی روانگی کے لیے حتمی منظوری دی جائے گی۔ وزیراعظم کی ہدایت کے مطابق متعلقہ حکام میتوں کی پاکستان منتقلی کے عمل کو جلد مکمل کرنے کے لئے مسلسل رابطے میں ہیں۔

وزیراعظم محمد شہباز شریف نے صومالیہ میں جاں بحق ہونے والے پاکستانی شہری سید کاشف عمر، احمد انصاری اور رفیع للہ کی میتوں کو پاکستان واپس لانے کے لیے ہر ممکن معاونت کی یقین دہانی کرائی تھی ۔وزیراعظم نے گزشتہ روز مرحوم کے بیٹے اذہان کاشف سے ٹیلیفون پر گفتگو کرتے ہوئے ان کے والد کے انتقال پر دلی تعزیت کا اظہار کیا اور یقین دلایا کہ حکومت ان کے والد سمیت دیگر میتوں کی جلد از جلد پاکستان منتقلی کے لیے تمام ضروری اقدامات کرے گی۔