وزیراعظم کے معاون خصوصی رانا احسان افضل کا این ٹی یو فیصل آباد کا دورہ، ٹیکسٹائل تحقیق و اختراع پر بریفنگ

اسلام آباد۔21نومبر (اے پی پی):وزیراعظم کے معاون خصوصی برائے تجارت رانا احسان افضل خان نے جمعہ کو نیشنل ٹیکسٹائل یونیورسٹی فیصل آباد کا دورہ کیا۔ دورے کے دوران معاون خصوصی کو یونیورسٹی کی ٹیکسٹائل سیکٹر میں تحقیق، ترقی اور اختراعی سرگرمیوں، پائیدار ٹیکسٹائل، ٹیکنیکل ٹیکسٹائل، سمارٹ میٹریل اور ماحول دوست پروسیسنگ ٹیکنالوجیز میں یونیورسٹی کے جاری منصوبوں کے بارے میں بریفنگ دی گئی۔

رانا احسان افضل خان کو نیشنل ٹیکسٹائل یونیورسٹی کے مضبوط صنعتی روابط سے آگاہ کیا گیا جیسے کہ ٹیکنالوجی کی منتقلی کے لئے فیصل آباد کی ٹیکسٹائل ملوں کے ساتھ شراکت داری اور مہارت کی ترقی کے پروگرام جو پیشہ ور افراد کو سالانہ تربیت دیتے ہیں۔رانا احسان افضل خان نے ٹیکسٹائل کی صنعت میں این ٹی یو کے تعاون کو سراہا جو کہ پاکستان کی سالانہ 15 ارب ڈالر سے زائد کی برآمدات کا 60 فیصد حصہ ہے۔ انہوں نے اختراع کو آگے بڑھانے اور 2030 تک ٹیکسٹائل کی برآمدات میں 50 ارب ڈالر کے حصول کے لئے اکیڈمیا-انڈسٹری پارٹنرشپ کے لئے وزارت تجارت کی جانب سے مسلسل حمایت کا یقین دلایا۔