وفاقی وزیر برائے تخفیفِ غربت سید عمران احمد شاہ کی پاکستان گلوبل مینٹل ہیلتھ سمٹ 2026 کی اختتامی تقریب میں شرکت

اسلام آباد۔2اکتوبر (اے پی پی):وفاقی وزیر برائے تخفیفِ غربت و سماجی تحفظ سید عمران احمد شاہ نے پاکستان گلوبل مینٹل ہیلتھ سمٹ 2026 کی اختتامی تقریب میں بطور مہمان خصوصی شرکت کی۔ جمعہ کو وزارت سے جاری بیان کے مطابق دو روزہ سمٹ یکم اور 2 اکتوبر کو منعقد ہوئی جس میں قومی و بین الاقوامی ماہرینِ ذہنی صحت، پالیسی سازوں، ترقیاتی شراکت داروں، اقوامِ متحدہ کے اداروں، جامعات، سول سوسائٹی اور دیگر متعلقہ سٹیک ہولڈرز نے شرکت کی۔

سمٹ کے دوران پاکستان میں ذہنی صحت کے نظام کو مضبوط بنانے، معیاری ذہنی صحت کی سہولیات تک رسائی بہتر بنانے، پائیدار مالی معاونت، کمیونٹی بیسڈ ذہنی صحت کی خدمات کے فروغ اور مختلف اداروں کے درمیان مؤثر تعاون کے حوالے سے تفصیلی غور و خوض کیا گیا۔شرکاء نے اس امر پر زور دیا کہ ذہنی صحت کی سہولیات کو پرائمری ہیلتھ کیئر اور تعلیمی اداروں تک وسعت دینے کے ساتھ ساتھ ذہنی صحت کے شعبے سے وابستہ افرادی قوت کو مضبوط بنایا جائے جس میں سکول سائیکالوجسٹس بھی شامل ہیں۔

شرکاء نے وفاقی، صوبائی اور علاقائی سطح پر مربوط اقدامات کے ذریعے بچوں، نوجوانوں، خواتین اور معاشرے کے کمزور و محروم طبقات سمیت تمام افراد کے لئے قابلِ رسائی، سستی اور معیاری ذہنی صحت کی سہولیات یقینی بنانے کے عزم کا اظہار کیا۔وفاقی وزیر سید عمران احمد شاہ نے ذہنی صحت کے مسائل سے نمٹنے اور معاشرے میں مجموعی فلاح و بہبود کے فروغ کے لئے ایک مربوط، جامع اور عوام مرکوز حکمتِ عملی کی اہمیت کو اجاگر کیا۔پاکستان گلوبل مینٹل ہیلتھ سمٹ 2026 کا اختتام پاکستان میں ایک مضبوط، مؤثر، پائیدار اور ہر فرد کے لئے قابلِ رسائی ذہنی صحت کے نظام کے قیام کے لئے مشترکہ عزم کے ساتھ ہوا۔