پاکستان کا سوڈان میں تعلیمی اداروں کے فوری تحفظ کا مطالبہ

اقوام متحدہ ۔8اگست (اے پی پی):اقوام متحدہ میں پاکستان نے سوڈان میں تعلیمی اداروں کے فوری تحفظ کا مطالبہ کیاہے۔

سوڈان میں ایک ہزار روز سے زائد عرصے سے جاری جنگ کے باعث لاکھوں بچے تعلیم سے محروم، بے گھر یا سنگین خلاف ورزیوں کے خطرے سے دوچار ہیں، پاکستان نے تمام فریقوں پر زور دیا ہے کہ وہ بین الاقوامی انسانی قانون کی پاسداری کریں اور تعلیمی اداروں کا فوری تحفظ یقینی بنائیں۔اقوام متحدہ میں پاکستان مشن کے فرسٹ سیکرٹر ی سید انصار شاہ نے سوڈان میں تعلیم کے تحفظ سے متعلق اقوام متحدہ کی سلامتی کونسل کے ’’اریّا فارمولا‘‘ اجلاس سے خطاب کرتے ہوئے کہا کہ اس تنازع کو فوری طور پر ختم کرنا اولین ترجیح اور بنیادی مقصد ہونا چاہیے۔اریّا فارمولا اجلاس سلامتی کونسل کے ارکان کو اہم عالمی معاملات پر کھل کر اور غیر رسمی انداز میں تبادلہ خیال کا موقع فراہم کرتے ہیں۔

سوڈان میں جنگ زدہ تعلیمی نظام کے تحفظ کے لیے منعقدہ اجلاس کا اہتمام صومالیہ، جمہوری جمہوریہ کانگو اور لائبیریا نے کیا۔سید انصار شاہ نے خبردار کیا کہ سوڈان میں جاری جنگ ایک پوری نسل کا مستقبل تباہ کرنے کا خطرہ بن چکی ہے۔ انہوں نے کہا کہ تعلیم کا تحفظ کوئی ثانوی معاملہ نہیں بلکہ شہریوں کے تحفظ اور پائیدار امن کے قیام کا بنیادی جزو ہے۔پاکستانی مندوب کے مطابق تنازع کے نتیجے میں ایک کروڑ 70 لاکھ سے زائد بچوں کی تعلیم شدید متاثر ہوئی ہے، جبکہ تقریباً **80 لاکھ بچے اس وقت اسکولوں سے باہر ہیں۔انہوں نے کہا کہ صرف دارفور میں اسکول جانے کی عمر کے **30 لاکھ سے زائد بچے** تعلیم سے محروم ہیں۔

ان کے بقول یہ محض اعداد و شمار نہیں بلکہ ایسی نسل کی نمائندگی کرتے ہیں جو بے گھری، غربت، استحصال، مایوسی اور منفی عناصر کی جانب سے بھرتی جیسے خطرات سے دوچار ہے۔سید انصار شاہ نے تین اہم ترجیحات پر زور دیا۔ ان میں تمام فریقوں کی جانب سے بین الاقوامی انسانی قانون کی پاسداری اور بچوں، اساتذہ اور امدادی کارکنوں کے لیے محفوظ رسائی یقینی بنانا شامل ہے۔انہوں نے کہا کہ سوڈان کے تسلیم شدہ قومی تعلیمی نظام، امتحانات اور اسناد کا تحفظ بھی ضروری ہے تاکہ بچوں کو طویل مدت تک تعلیم سے محرومی کا سامنا نہ کرنا پڑے اور قومی یکجہتی برقرار رہے۔پاکستانی مندوب نے عالمی برادری پر زور دیا کہ بے گھر اور پناہ گزین بچوں کے لیے تعلیم، ہنگامی تعلیمی پروگرام، اسکولوں کی بحالی اور اساتذہ کی معاونت کو عالمی امدادی کوششوں میں ترجیح دی جائے۔