ڈیرہ غازی خان میں کسان سہولت کاروں کا 18 روزہ تربیتی پروگرام مکمل

ڈیرہ غازی خان۔03 اکتوبر (اے پی پی):ڈیرہ غازی خان میں زراعت اور آن فارم واٹر مینجمنٹ کے حوالے سے کسان سہولت کاروں کے لیے منعقدہ 18 روزہ تربیتی پروگرام مکمل ہوگیا۔ تربیتی پروگرام میں 31 کسان سہولت کاروں نے شرکت کی، جنہوں نے موسمیاتی تبدیلی کے چیلنجز، پانی کے مؤثر استعمال اور جدید و پائیدار زرعی طریقوں سے متعلق اپنی فنی و عملی صلاحیتوں کو بہتر بنایا۔تربیتی پروگرام کی اختتامی تقریب میں ڈپٹی ڈائریکٹر زراعت توسیع غلام محمد اور سربراہ شعبہ فوڈ سائنسز غازی یونیورسٹی طاہرہ بتول نے بطور مہمانانِ خصوصی شرکت کی۔

اس موقع پر خطاب کرتے ہوئے غلام محمد نے کسان سہولت کاروں کو مبارکباد دیتے ہوئے امید ظاہر کی کہ تربیت کے دوران حاصل کردہ علم اور مہارتوں کو فیلڈ میں کاشتکاروں کی رہنمائی اور موسمیاتی موافق زراعت کے فروغ کے لیے مؤثر انداز میں استعمال کیا جائے گا۔انہوں نے کہا کہ زراعت ہمارے ملک کی ترقی میں ریڑھ کی حیثیت رکھتی ہے اور اس کے تربیتی پروگرام مستقبل میں بھی جاری رکھے جائیں گے۔

تقریب کے اختتام پر تربیت مکمل کرنے والے کسان سہولت کاروں کی کاوشوں کو سراہا گیا اور مستقبل میں کسانوں تک جدید زرعی معلومات مؤثر انداز میں پہنچانے کے عزم کا اظہار کیا گیا۔