لاہور۔19 اکتوبر(اے پی پی ) وفاقی وزیر اطلاعات و نشریات سینیٹر پرویز رشید نے کہا ہے کہ عمران خان یلغار اورلشکر کشی سے پاکستان کی سیاست میں فساد برپا کرنا چاہتے ہیں، وہ مایوسی کی انتہا کو پہنچ چکے ہیں، حکومت نے اسلام آباد کو رواں دواں رکھنے کی منصوبہ بندی کرلی ہے ،اسلام آباد سیکرٹریٹ اور شاہراہوں کو بند کرنے والوںکے خلاف قانون اپنا راستہ بنائے گا۔ بدھ کو یہاں ایکسپو سنٹر میں میڈیاسے گفتگوکرتے ہوئے سینیٹر پرویز رشید نے کہا کہ عمران خان کے جو مطالبات ہیں ان کو حل کرنے کے پلیٹ فارم موجود ہیں، عمران خان کے مطالبات سے بھاگے نہیں، وزیر اعظم محمد نوازشریف سپریم کورٹ اور قومی اداروں میں اپنی پوزیشن کلیئر کریں گے، عمران خان بھی دھرنوں کی بجائے سپریم کورٹ اور الیکشن کمیشن تک رہیں۔ انہوںنے کہا کہ عمران خان مایوسی کی انتہا کو پہنچ چکے ہیں، ایسی اطلاعات ہیں کہ انہوں نے پاکستان میں غیر جمہوری سوچ رکھنے اور فتنہ و فساد برپا کرنے کی طاقت رکھنے والی تنظیموں کے کارکنوں تک رسائی حاصل کی ہے حالانکہ ان کارکنوں کا پی ٹی آئی سے کوئی تعلق نہیں لیکن وہ انہیں اپنی پارٹی کے پرچم تھما کر اسلام آباد لے جا کر شر پھیلانا چاہتے ہیں۔ وفاقی وزیر اطلاعات و نشریات سینیٹر پرویز رشید نے کہا کہ عمران خان نے قتل و غارت کی جوباتیں کی ہیں یہ اسی تناظر میں ہیں، وہ یلغاراورلشکر کشی سے پاکستان کی سیاست میں فساد برپا کرنا چاہتے ہیں حالانکہ ان کے جو مطالبات ہیں ان کے حل کیلئے پاکستان میںپلیٹ فارم موجود ہیں ۔
