اسلام آباد ۔ 6 دسمبر (اے پی پی) توانائی کے بارے میں کابینہ کمیٹی کی طرف سے تشکیل دی گئی کمیٹی کا اجلاس پانی و بجلی کے وفاقی وزیر خواجہ محمد آصف کی صدارت میں منعقد ہوا۔ یہ اجلاس کراچی الیکٹرک کی ٹرانزیکشن پر تبادلہ خیال کرنے کے سلسلے میں ہوا جس میں وزیر پٹرولیم و قدرتی وسائل، چیئرمین نجکاری کمیشن، چیئرمین سرمایہ کاری بورڈ نے بھی شرکت کی۔ کمیٹی کے اس اجلاس میں وزارت پانی و بجلی، وزارت پٹرولیم و قدرتی وسائل، خزانہ اور قانون و انصاف ڈویژن کے اعلی سطحی نمائندے بھی موجود تھے۔ اجلاس میں کے الیکٹرک کی مجوزہ نئی حصص ہولڈر شنگھائی الیکٹرک پاور نے کراچی الیکٹرک کی انتظامیہ کے ہمراہ 9 ارب ڈالرز کی اس سرمایہ کاری کا اپنا بزنس پلان پیش کیا جو کہ کراچی الیکٹرک کمپنی کے انفراسٹرکچر سمیت بجلی کی ترسیل، تقسیم اور بجلی کی پیداوار کو بہتر بنانے کیلئے بنایا گیا ہے۔ شنگھائی الیکٹرک پاور چین میں بجلی کے شعبہ کی سب سے بڑی کمپنیوں میں سے ایک ہے، اس کمپنی کے ماہرین نے اجلاس میں کمپنی کے پروفائل، بین الاقوامی سطح کی مہارت اور اس قسم کے تجربہ بارے بتایا۔ حکومت پاکستان نے کے الیکٹرک کے حصص ہولڈر میں تبدیلی اور سرمایہ کاری کا خیرمقدم کیا ہے۔
Short Link: https://urdu.app.com.pk/urdu/?p=32397
