اوکاڑہ۔ 22 جنوری (اے پی پی):دو روزہ بین الاقوامی "پاکستان ہارٹی ایکسپو "2023 کا انعقاد 28 جنوری کو ہوگا، ترجمان محکمہ زراعت پنجاب نے کہا ہے کہ محکمہ زراعت کے زیر اہتمام دو روزہ بین الاقوام "پاکستان ہارٹی ایکسپو 2023 ” کا انعقاد کیا جا رہا ہے جس میں پاکستانی پھلوں، سبزیوں اور ان سے بنی مصنوعات کو بین الاقوامی سطح پر اجاگر کیا جائے گا۔
اس دو روزہ پاکستان ہارٹی ایکسپو 2023 کے لئے 28 اور 29 جنوری کو سٹالز ایکسپو سنٹر جوہر ٹاؤن لاہور میں لگائے جائیں گے۔ امسال اس نمائش میں 100 سے زائد سٹالز لگائے جائیں گے اور تاجکستان، ازبکستان، بیلا روس، قازقستان، سعودی عرب، دوبئی، قطر، بحرین، سری لنکا، انڈونیشیا، ملائیشیا اور ترکی سے ماہرین، ایکسپوٹرز و دیگر اسٹیک ہولڈرز شرکت کریں گے۔
ترجمان محکمہ زراعت پنجاب نے مزید بتایا کہ اس نمائش سے قبل محکمہ زراعت ایسی آٹھ نمائشوں کا انعقاد کر چکا ہے جس میں مجموعی طور پر 20 ممالک سے 150 سے زائدوفود نے شرکت کی۔ ان نمائشوں کے انعقاد سے پاکستانی برآمدات میں مجموعی طور پر 20 ملین ڈالرز کا اضافہ ہوا تھا۔
پاکستان ہارٹی ایکسپو 2023 کے انعقاد سے زرعی شعبہ سے وابستہ لوگوں کو ایک ایسا پلیٹ فارم مہیا کیا جا رہا ہے جو پاکستانی مصنوعات کو پوری دنیا میں متعارف کروانے کا ذریعہ بنے گا اور ہماری زرعی برآمدات میں اضافہ ہوگا۔
Short Link: https://urdu.app.com.pk/urdu/?p=347420
