فیصل آباد۔22جون (اے پی پی):محکمہ زراعت توسیع فیصل آباد کے اسسٹنٹ ڈائریکٹرڈاکٹرخالد اقبال نے کہا کہ پنجاب کے مختلف اضلاع میں بھنڈی کی اوسط پیداوار 120من فی ایکڑ تک پہنچ گئی ہے، جس کی کاشت سال میں 2 بار جون ،جولائی اور فروری، مارچ میں کی جاسکتی ہے ، گزشتہ سال 13ہزار ایکڑ سے زائد رقبہ پر بھنڈی کی کاشت سے 59 ہزار ٹن کے قریب پیداوار حاصل ہوئی۔
ڈاکٹرخالد اقبال نے بتایاکہ بھنڈی کی کاشت کے لیے گرم مرطوب آب وہوا کی ضرورت ہوتی ہے تاہم یہ فصل کہرکے اثرات کو برداشت نہیں کرسکتی۔ انہوں نے کہا کہ فروری و مارچ میں کاشتہ فصل اگست و ستمبر میں پھل دیتی ہے جبکہ جون و جولائی میں کاشتہ فصل اکتوبر نومبر تک پیداوار دینے کے قابل ہو جاتی ہے۔ انہوں نے کہاکہ بھنڈی کی منظور شدہ قسم سبزی پری ہے جس کی بوائی کے لیے اچھی اگاؤ والا 10 سے 12 کلوگرام بیج فی ایکڑ استعمال کیاجاسکتاہے تاہم بیج کی فصل کا شت کرنےکے لیے بھنڈی کا 6کلوگرام بیج فی ایکڑ ہی کافی ہے۔
انہوں نے کہا کہ بھنڈی کی فصل 20 سے 30ڈگری سینٹی گریڈ درجہ حرارت پر بہترین اگاؤ اور بڑھوتری فراہم کرتی ہے۔ انہوں نے کہاکہ بھنڈی توری کو ہر قسم کی زمین میں کاشت کیا جاسکتا ہے البتہ زرخیز میرا اور پانی کے بہتر نکاس والی زمین جس کی تیزابی خاصیت6 سے 6.8 ہو بہترین پیداوار کے لیے موزوں ہے۔
Short Link: https://urdu.app.com.pk/urdu/?p=370559
