سیالکوٹ۔4جولائی (اے پی پی):ترجمان محکمہ زراعت نے ترشادہ پھلوں کے باغبانوں کو پھل کی اچھی پیداوار کے حصول کےلئے باغات میں کھادوں کےمتناسب استعمال کی ہدایت کی ہے۔انہوں نے بتایا کہ ترشادہ پھلوں کی اچھی پیداوارکےلئے کھادوں کا استعمال بنیادی اہمیت کا حامل ہے،غذائی عناصر کی کمی بیشی ترشادہ پھلوں کی صحت ، نشوونما،پیداواراور معیارپر برےاثرات مرتب کرتی ہے۔
انہوں نے”اے پی پی“کو بتایا کہ پودے کو جن غذائی اجزاءکی ضرورت ہوتی ہے ان میں نائٹروجن سب سے زیادہ اہمیت کی حامل ہے۔انہوں نے کہا کہ نائٹروجن کھاد پودے کی بڑھوتری اور اس کی نشوونما میں بھرپور معاونت فراہم کرتی ہے علاوہ ازیں نائٹروجنی کھادکا استعمال ترشادہ پھلوں کے پودوں میں کلوروفل بنانے میں بھی معاونت کرتاہے ۔پھول اور پھل کے بننے،پھل کی بڑھوتری اور اس کے معیار کےلئے نائٹروجنی کھادکا بروقت استعمال ضروری ہے۔
انہوں نے کہا کہ اگر باغبان کھادوں کا مناسب استعمال کرنے سے غفلت برتیں گے تو انہیں کئی مسائل کا سامنا کرناپڑسکتاہے۔انہوں نے کہا کہ اس ضمن میں باغبان حضرات محکمہ زراعت کے فیلڈ سٹاف سے بھی رہنمائی حاصل کرسکتے ہیں۔
Short Link: https://urdu.app.com.pk/urdu/?p=372233
