فیصل آباد۔ 18 اگست (اے پی پی):زرعی یونیورسٹی فیصل آباد میں یوم شجر کاری کے حوالے سے تقریب کا انعقاد کیا گیا۔ جس کی صدارت وائس چانسلر پروفیسر ڈاکٹر اقرار احمد خاں نے کی۔ اس موقع پر پرووائس چانسلر ڈین کلیہ زراعت پروفیسر ڈاکٹر محمد سرور خاں چیئرمین فارسٹری ڈاکٹر عرفان احمد، چیئرمین رورل سوشیالوجی ڈاکٹر اظہار احمد خاں، ٹریثرر عمر سعید قادری، ایسوسی ایٹ پروفیسر ڈاکٹر افتخار احمد، ڈائریکٹر فارم ڈاکٹر صفدر علی،ڈاکٹر ہارون و دیگر بھی موجود تھے۔
تقریب کا انعقاد ڈیپارٹمنٹ آف فارسٹری اور ڈیپارٹمنٹ آف رورل سوشیالوجی کے باہمی تعاون سے کیاگیا۔ ڈاکٹر اقرار احمد خاں نے کہا کہ موسمیاتی تبدیلیاں پوری دنیا کیلئے ایک بڑا چیلنج بن چکا ہے جس کی وجہ سے زراعت کی پیداوار بھی متاثر ہو رہی ہے۔ انہوں نے کہا کہ موسمیاتی تبدیلیوں کا مقابلہ کرنے کیلئے ہمیں نہ صرف گرین نیٹ بڑھانا ہوگا بلکہ اس کے ساتھ ساتھ آلودگی پر بھی قابو پانے کیلئے موثر اقدامات عمل میں لانا ہونگے۔ انہوں نے کہا کہ زرعی یونیورسٹی کا شمار دنیا کی اولین گرین جامعات میں ہوتا ہے اور یہی وجہ ہے کہ یونیورسٹی کا درجہ حرارت باقی شہر کی نسبت ایک سے دو درجے کم ہے۔
انہوں نے کہا کہ اس ماہ یونیورسٹی میں تین ہزار پودے لگا ئے گئے ہیں جس میں مین کیمپس، پارس کیمپس اور چوکیرا فارم شامل ہیں۔ انہوں نے ڈائریکٹر فارم کو ہدایات کی ہیں کہ چوکیرہ فارم کو سرسبز و شاداب بنانے کیلئے تمام ممکنہ کاوشیں عمل میں لائی جائیں۔ پروفیسر ڈاکٹر محمد سرور خاں نے کہا کہ ہمیں عوامی سطح پر زیادہ سے زیادہ پلانٹیشن کے حوالے سے آگاہی پیدا کرنی ہوگی۔انہوں نے کہا کہ زرعی یونیورسٹی اس حوالے سے شعور بیدار کرنے کیلئے اہم کردار ادا کر رہی ہے۔
ڈاکٹر عرفان نے اس موقع پر گرین یوتھ موومنٹ کے پراجیکٹ کے تحت زرعی یونیورسٹی فیصل آباد میں ڈسٹ بن بھی تقسیم کی گئیں۔ اس موقع پر ڈیپارٹمنٹ آف فارسٹری اور ڈیپارٹمنٹ آف رورل سوشیالوجی کے تعاون سے واک کا بھی اہتمام کیا گیا۔ واک کے اختتام پر پروفیسر ڈاکٹر اقرار احمد خاں نے باؤ باب کا پودا لگایا۔اس موقع پر ڈاکٹر نوید فرح، ڈاکٹر محمد آصف اور طلبہ کی کثیر تعداد بھی موجود تھی۔
Short Link: https://urdu.app.com.pk/urdu/?p=380510