لاہور۔21نومبر (اے پی پی):محکمہ زراعت نے گندم کی فی ایکڑ زیادہ پیداوار کیلئے سفارشات جاری کردیں۔ ترجمان محکمہ زراعت پنجاب کے مطابق آبپاش علاقوں کے کاشتکارگندم کی کاشت رواں ماہ کے دوران مکمل کر لیں اور زیادہ پیداوار کے لئے محکمہ زراعت کی منظور شدہ اقسام کا تصدیق شدہ بیج استعمال کریں،آبپاش علاقوں کے کاشتکار گندم کی زیادہ پیداوار کے لئے صادق21،نواب21،نشان21،ڈیورم2021،این اے آر سی سپر،غازی19،سبحانی21،رہبر21 اورایم ایچ21 کی کاشت30 نومبر تک مکمل کر لیں۔اس کے علاوہ عروج 22،اکبر19،دلکش 20،جوہر16،بورلاگ 16،زنکول 16،اجالا16،اناج 17،بھکر سٹار19 اور فیصل آباد8 کی کاشت 10 دسمبر تک مکمل کر لیں۔
جنوبی پنجاب کے تمام اضلاع کیلئے صادق 21 اور نواب 21 زیادہ موزوں اقسام ہیں،کاشتکاربوائی کے لیے21 نومبر تا10 دسمبر50 کلوگرام بیج فی ایکڑ استعمال کریں اور بیج کے اگائو کی شرح85 فیصد سے ہرگز کم نہیں ہونی چاہیے۔گندم کی مختلف بیماریوں میں کانگیاری، کرنال بنٹ،گندم کی بلاسٹ اور اکھیڑا وغیرہ نقصان دہ ہیں جو کہ پیداوار میں نقصان کا باعث بنتی ہیں،ان بیماریوں سے بچائو کے لئے بیج کو بوائی سے پہلے تھائیو فنیٹ میتھائل بحساب دو تا اڑھائی گرام فی کلو گرام بیج یا امیڈا کلوپرڈ +ٹیبو کو نا زول بحساب 4 ملی لٹر فی کلو گرام بیج لگائیں۔
بہتر ہے کہ بیج کو زہر لگانے کے لئے گھومنے والا ڈرم استعمال کیا جائے،اگر یہ میسر نہ ہو تو پلاسٹک کی ایک بوری میں وزن شدہ بیج اور سفارش کردہ زہر ڈال کر بوری کا منہ باندھ کر اوردونوں طرف سے پکڑ کر اچھی طرح ہلائیں تا کہ بیج کے ہردانے کو زہر لگ جائے،خیال رہے کہ بوری کو تقریبا آدھا بھرا جائے۔ترجمان کے مطابق گندم کی اچھی پیداوار حاصل کرنے کے لئے کھیت کا تیار اور ہموار ہونا بہت ضروری ہے، وریال کھیتوں میں دو یا تین دفعہ ہل چلائیں اور جہاں کہیں زمین کو ہموار کرنا ضروری ہو کر اہ یا لیزرلیولر سے زمین کو ہموار کریں،
رانی سے پہلے کھیتوں کو چھوٹے حصوں میں تقسیم کریں تا کہ کم پانی سے زیادہ رقبے پر رانی ہوسکے، جب بوائی کا وقت نزدیک آئے تو سورج نکلنے سے پہلے ہل چلائیں اور سہا گہ دیں، یہ عمل2 یا3 بار دوہرانے سے جڑی بوٹیاں تلف ہو جائیں گی اور زمین کی نیچے کی نمی اوپر آجائے گی جو گندم کے اچھے اگائو کی ضامن ہوگی۔ترجمان نے مزید کہا کہ کاشتکار فوڈ سکیورٹی کو یقینی بنانے کیلئے زیادہ سے زیادہ رقبہ پر گندم کی کاشت کریں۔
Short Link: https://urdu.app.com.pk/urdu/?p=412809
